Унёсак малога бізнесу ў эканоміку Беларусі невысокі ў параўнанні з іншымі краінамі, паведаміў на XIV Міжнароднай навуковай канферэнцыі па пытаннях прагназавання ў лістападзе 2013 года намеснік міністра эканомікі Аляксандр Ярашэнка, выступленне якога апублікавана ў студзеньскім нумары «Экономического бюллетеня».
«У краінах з пераходнай эканомікай роля малога бізнесу ў эканамічным развіцці пакуль адносна невысокая. У Рэспубліцы Беларусь доля малога бізнесу ў агульнай колькасці занятых складае 18,4%, а ў агульным аб'ёме ВУП краіны — каля 16%. Пры гэтым большая частка суб'ектаў прадпрымальніцтва сканцэнтравана ў сферы абслугоўвання — 42%, у той час як у прамысловасці іх доля складае толькі 15%», — канстатаваў Ярашэнка.
Ён звярнуў таксама ўвагу на той факт, што ў Беларусі «практычна няма суб'ектаў малога прадпрымальніцтва, якія выпускаюць прадукцыю па ліцэнзіях буйных прадпрыемстваў, няма іх і сярод субпастаўшчыкоў і субпадрадчыкаў апошніх». «Разам з тым у эканамічна развітых краінах на гэтым сегменце рынку працуюць 70-80% малых прадпрыемстваў», — нагадаў Ярашэнка.
У сувязі з гэтым, мяркуе намеснік міністра, пры распрацоўцы стратэгіі развіцця малога і сярэдняга бізнесу «акцэнт павінен быць зроблены на сферы вытворчасці і інавацыйнай дзейнасці».
«У кожным рэгіёне краіны варта ствараць базавыя цэнтры падтрымкі малога прадпрымальніцтва па аказанні комплексу паслуг такім суб'ектам, у тым ліку базы даных па пытаннях арганізацыі і ажыццяўлення прадпрымальніцкай дзейнасці», — сказаў Ярашэнка.
Частку памяшканняў і будынкаў, што знаходзяцца ў камунальнай уласнасці, можна перадаць ва ўласнасць, арэнду ці бязвыплатнае карыстанне суб'ектам інфраструктуры падтрымкі малога бізнесу, мяркуе намеснік міністра эканомікі.
Паводле даных Міністэрства эканомікі, у краінах — членах ЕС унёсак малога і сярэдняга бізнесу ў эканамічныя паказчыкі істотна вышэйшы, чым у Беларусі. Так, у Германіі малыя і сярэднія прадпрыемствы фарміруюць каля 50% ВУП, у іншых краінах ЕС (у прыватнасці ў Італіі і Францыі) гэты паказчык яшчэ вышэйшы. Разам з тым у Беларусі ўнёсак малога і сярэдняга бізнесу ў ВУП складае, паводле даных Мінэканомікі, 15,7%.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2424
Каментары