Баевікі з установак «Град» абстралялі пазіцыі сіл АТА ў Зяленаполлі (Луганская вобласць), ёсць загінулыя сярод вайскоўцаў.
Пра гэта паведаміў прэс-сакратар АТА Уладзіслаў Селязнёў. «Факт таго, што па Зяленаполлі баевікі з «Градаў» адпрацавалі — так, сярод нашых сіл страты — так, дэталі будуць пазней і хутчэй за ўсё на самым высокім узроўні», — сказаў ён.
«Пацвярджаю гэтыя падзеі, але пакуль ніякіх дэталяў сказаць не магу, колькасць ахвяр удакладняецца», — дадаў прадстаўнік АТА.
Па словах актывіста Майдану Уладзіміра Парасюка, тут была абстраляна матарызаваная брыгада, што прыбыла з Львоўскай вобласці.
Ён напісаў: «Толькі што паведамілі вельмі непрыемную навіну. Сёння ў 05:00 раніцы каля в.Зялёнаполле Луганскай вобл. расійскія баевікі з ўстаноўкі «Град» абстралялі нашых хлопцаў з 24-й матарызаванай брыгады (Явароўшчына, Львоўская вобл.) Вялікая колькасць параненых і забітых. Сувязі няма, усё згарэла. Падмога не прыходзіць»
«Пра гэты жах мне паведаміў мой сабрат, які цяпер там», — дадаў ён. Па словах Парасюка, па неафіцыйных дадзеных колькасць загінулых вайскоўцаў — каля 30 чалавек і больш за 100 параненых.
У сваю чаргу, Канстанцін Палякоў, які служыць у 79-й брыгадзе, адзначае,
што ад першага батальёна брыгады фактычна нічога не засталося пасля абстрэлу сёння ноччу.
«Я служу ў другім батальёне 79-й (маецца на ўвазе 79-я Мікалаеўская аэрамабільная брыгада). Сёння ноччу яны прайшлі міма нас. Меў кантакты з байцамі першага. За імі выйшла калона. Вярнуцца — даведаюся больш», - піша Палякоў.
У сваю чаргу камандзір данецкіх баевікоў Ігар Стралкоў паведаміў на гэты конт: «Пацвярджаю. Калона разгромлена «ў хлам»».
Звестак пра страты сярод вайскоўцаў ён не прывёў.
«У пасёлку Зяленаполле ў выніку абстрэлу тэрарыстамі з сістэмы «Град» загінула больш за 30 вайскоўцаў».
Пра гэта ў ходзе брыфінгу заявіў дарадца міністра ўнутраных спраў Зоран Шкірак, перадае карэспандэнт РБК-Украіна.
«Пакуль інфармацыя тая, што ёсць - 30 забітых. Я дапускаю, што ахвяр у выніку будзе больш», - заявіў Шкірак.
Як піша прадстаўнік «Свабоды» Руслан Андрыйка ў сваім Facebook, бой адбыўся каля 4-5-й раніцы. Былі абстраляныя 24 і 79 брыгады з «Граду» з вялікай адлегласці, прыкладна 20 км. «Нават нельга было ўбачыць крыніцу агню. Патрапілі ў боепрыпас у тым ліку. Загінула прынамсі 25 чалавек, паранена больш за 100», - напісаў Андрыйка.
Цяпер чытаюць
«Усё так ці інакш будзе вырашацца на полі бою». Чым будзе займацца новая кіраўніца Місіі дэмакратычнай Беларусі ва Украіне?9
Каментары