Прыгаворам судовай калегіі па крымінальных справах Магілёўскага абласнога суда асуджаны 23-гадовы неаднаразова судзімы за крадзяжы і ўгон аўтатранспартных сродкаў жыхар Горацкага раёна за ўчыненне злачынстваў, прадугледжаных п. 6 ч. 2 арт. 139 КК (забойства, учыненае з асаблівай жорсткасцю), ч. 1 арт. 14 і пп. 6, 16 ч. 2 арт. 139 КК (замах на забойства, учыненае з асаблівай жорсткасцю, асобай, якая раней учыніла забойства), ч. 2 арт. 205 КК (крадзеж маёмасці, учынены паўторна), ч. 2 арт. 214 УК (угон транспартнага сродку паўторна, без мэты крадзяжу).
Як паведаміла старшы памочнік пракурора Магілёўскай вобласці Ала Кузняцова, абвінавачваны ў кастрычніку 2013 года разам са сваім 62-гадовым знаёмым у доме апошняга ў Горацкім раёне распівалі спіртныя напоі. Падчас сваркі госць накінуўся на спадара з кулакамі, а затым стаў збіваць яго качаргой. Усяго нанёс пацярпеламу не менш чым 24 удары па жыццёва важных органах, у тым ліку па галаве. У выніку смерць пацярпелага наступіла на месцы здарэння ад адкрытай пранікаючай чэрапна-мазгавой траўмы.
Злачынца схаваў труп у скрыню для бялізны ў канапе. Выкраў мабільны тэлефон забітага, зачыніў кватэру на ключ, які выкінуў на вуліцы. Затым угнаў аўтамабіль пацярпелага, на якім ездзіў тыдзень. Сваякам пацярпелага, якія яго адшуквалі, сказаў, што адвёз яго ў Оршу, адкуль той паехаў на заробкі ў Расію. Падман раскрыўся пасля таго, як сваякі даведаліся ў білетных касах аб тым, што мужчына білеты на цягнік не набываў.
Праз тыдзень абвінавачваны зайшоў да сваёй суседкі, якая жыла паверхам ніжэй, і папрасіў перакрыць ваду. Яна спусцілася ў падвал, ён пайшоў за ёю, прыхапіўшы сякеру. Лязом і абухом сякеры ён нанёс пацярпелай не менш чым 20 удараў па жыццёва важных органах. Вырашыўшы, што жанчына памерла, абвінавачваны выкраў яе тэлефон, сумку з грашыма, замкнуў дзверы кватэры, сеў у машыну гаспадыні і з'ехаў.
У гэты дзень жанчына павінна была везці сваю маці ў бальніцу. Таму сваякі, выявіўшы знікненне жанчыны, своечасова знайшлі яе ў кватэры, куды яна выбралася з падвала, і даставілі ў бальніцу.
Прыгаворам суда зламыснік прызнаны вінаватым ва ўчыненых злачынствах і канчаткова па сукупнасці злачынстваў яму прызначана мера пакарання ў выглядзе 25 гадоў пазбаўлення волі з адбываннем у папраўчай калоніі ва ўмовах строгага рэжыму. Адначасова на карысць пацярпелай у лік кампенсавання маральнага ўрону з яго спагнана 80 млн. рублёў, і на карысць сваякоў забітага мужчыны — 100 млн. рублёў.
Каментары