Замест «невядомых чырвонаармейцаў» — сярэднявечныя беларусы ФОТЫ
У Ваўкавыску скончыліся раскопкі раннехрысціянскага могільніку XIII—XV стст.
Раскопкі на поўдні Гарадзеншчыны выявілі пахаванні часоў Вялікага Княства: шкілеты ў суправаджэнні няхітрага скарбу — керамікі, скроневых кольцаў, фібулаў ды крэсіваў.
«Сам могільнік быў выяўлены кур’ёзным чынам, — распавядае кіраўнік раскопак археолаг Генадзь Семянчук, які паходзіць з Ваўкавыску, — годзе ў 2005-м я заўважыў тут ямы і вырашыў, што гэта чорныя археолагі. Пацікаваў пару дзён, але ніхто не прыйшоў. Пасля толькі выявілася, што гэта справы пошукавага батальёна…»
Батальён папрацаваў «плённа»: 56 сярэднявечных шкілетаў былі пахаваныя ва ўрочышчы Парахаўня як невядомыя жаўнеры Другой суветнай, нягледзячы на тое, што Шведская і Замкавая горы ў Ваўкавыску з’яўляюцца археалагічнымі помнікамі і ахоўваюцца дзяржавай. Вось такое «рэха вайны».
Сёлетнія раскопкі ажыццяўляюцца сумеснымі высілкамі Гарадзенскага ўніверсітэту ды гісторыка-археалагічнага музею з горада над Нёманам. Студэнты-першакурснікі такім чынам праходзяць археалагічную практыку ў суправаджэнні старэйшых «спецоў». Наогул, на Гарадзеншчыне гэтым летам раскопкі таксама праводзяцца на гарадзішчы Беразавец, што на Карэліччыне, ды ў Любчанскім замку.
Наперадзе — апрацоўка здабытага ў Ваўкавыску матэрыялу.
Са словаў Генадзя Семенчука, Польская акадэмія навук імаверна дапаможа з аналізам ДНК шкілетаў.
Такім чынам можна будзе выявіць крэўныя сувязі — братоў, сёстраў, бацькоў і дзяцей.
А ўвосень ў супрацы з антраполагамі з Полацкага ўніверсітэта можна будзе зрабіць высновы пра ўзрост, пол, хваробы і выгляд пахаваных тут людзей.
Каментары