Прадстаўнікі грамадзянскай супольнасці могуць атрымаць права на ўдзел у дзейнасці АБСЕ
Прадстаўнікі грамадзянскай супольнасці могуць атрымаць права на ўдзел у дзейнасці Арганізацыі па бяспецы і супрацоўніцтве ў Еўропе (АБСЕ).
Аб гэтым паведаміў 16 верасня ў Мінску дырэктар бюро прадстаўніка АБСЕ па пытаннях свабоды СМІ Андрэй Рыхтар на пасяджэнні круглага стала з удзелам журналістаў, праваабаронцаў і прадстаўнікоў недзяржаўных арганізацый.
Паводле яго слоў, на чарговай канферэнцыі АБСЕ на ўзроўні міністраў замежных спраў у снежні гэтага года ў Швейцарыі плануецца прыняць дакумент, які, як мяркуецца, будзе «рэгламентаваць удзел грамадзянскай супольнасці ў дзейнасці АБСЕ». «Праект вельмі добры, паглядзім, якое рашэнне будзе прынята», — сказаў Рыхтар.
Для беларускіх недзяржаўных арганізацый важным з'яўляецца пытанне ўдзелу ў дзейнасці нацыянальных і міжнародных структур. Так, старшыня праўлення Цэнтра прававой трансфармацыі (Lawtrend) Алена Танкачова адзначыла, што сёння беларускія недзяржаўныя грамадскія арганізацыі, якія застаюцца «ў пазіцыі незалежнай ацэнкі», фактычна «пазбаўлены магчымасці публічнай камунікацыі з урадам».
Гэты тэзіс пацвердзіў і кіраўнік ліквідаванага праваабарончага цэнтра «Вясна» Алесь Бяляцкі. Ён адзначыў, што фактычна «адзінай пляцоўкай» для кантактаў незарэгістраваных арганізацый з беларускімі ўладамі з'яўляецца «сустрэча БДІПЧ у Варшаве». «У Беларусі ж такой пляцоўкі няма», — сказаў праваабаронца.
Бяляцкі папрасіў прадстаўніка АБСЕ па пытаннях свабоды СМІ Дуню Міятавіч і членаў яе бюро ўлічваць гэту сітуацыю і старацца «пасадзіць прадстаўнікоў [незарэгістраваных арганізацый] за круглы стол нароўні з усімі» пры любой магчымасці.
Праваабаронца заявіў, што сёння роля АБСЕ ва ўсходнееўрапейскім рэгіёне «пачынае ўзрастаць», і гэта звязана «з геапалітычнымі прычынамі». Паводле яго меркавання, гэта тэндэнцыя «будзе прыкметная і ў Беларусі», якая таксама з'яўляецца «часткай крызіснага рэгіёну». «У гэтай сітуацыі павінна быць і разуменне з боку АБСЕ, што цяпер гэта арганізацыя мае магчымасць паўплываць на тыя пытанні, якімі яна займаецца ў Беларусі», — сказаў Бяляцкі.
Бліжэйшым часам будуць вызвалены больш за 150 палітзняволеных39
Каментары