Pradstaŭniki hramadzianskaj supolnaści mohuć atrymać prava na ŭdzieł u dziejnaści ABSIE
Pradstaŭniki hramadzianskaj supolnaści mohuć atrymać prava na ŭdzieł u dziejnaści Arhanizacyi pa biaśpiecy i supracoŭnictvie ŭ Jeŭropie (ABSIE).
Ab hetym paviedamiŭ 16 vieraśnia ŭ Minsku dyrektar biuro pradstaŭnika ABSIE pa pytańniach svabody ŚMI Andrej Rychtar na pasiadžeńni kruhłaha stała z udziełam žurnalistaŭ, pravaabaroncaŭ i pradstaŭnikoŭ niedziaržaŭnych arhanizacyj.
Pavodle jaho słoŭ, na čarhovaj kanfierencyi ABSIE na ŭzroŭni ministraŭ zamiežnych spraŭ u śniežni hetaha hoda ŭ Šviejcaryi płanujecca pryniać dakumient, jaki, jak miarkujecca, budzie «rehłamientavać udzieł hramadzianskaj supolnaści ŭ dziejnaści ABSIE». «Prajekt vielmi dobry, pahladzim, jakoje rašeńnie budzie pryniata», — skazaŭ Rychtar.
Dla biełaruskich niedziaržaŭnych arhanizacyj važnym źjaŭlajecca pytańnie ŭdziełu ŭ dziejnaści nacyjanalnych i mižnarodnych struktur. Tak, staršynia praŭleńnia Centra pravavoj transfarmacyi (Lawtrend) Alena Tankačova adznačyła, što siońnia biełaruskija niedziaržaŭnyja hramadskija arhanizacyi, jakija zastajucca «ŭ pazicyi niezaležnaj acenki», faktyčna «pazbaŭleny mahčymaści publičnaj kamunikacyi z uradam».
Hety tezis paćvierdziŭ i kiraŭnik likvidavanaha pravaabarončaha centra «Viasna» Aleś Bialacki. Jon adznačyŭ, što faktyčna «adzinaj placoŭkaj» dla kantaktaŭ niezarehistravanych arhanizacyj ź biełaruskimi ŭładami źjaŭlajecca «sustreča BDIPČ u Varšavie». «U Biełarusi ž takoj placoŭki niama», — skazaŭ pravaabaronca.
Bialacki paprasiŭ pradstaŭnika ABSIE pa pytańniach svabody ŚMI Duniu Mijatavič i členaŭ jaje biuro ŭličvać hetu situacyju i staracca «pasadzić pradstaŭnikoŭ [niezarehistravanych arhanizacyj] za kruhły stoł naroŭni z usimi» pry luboj mahčymaści.
Pravaabaronca zajaviŭ, što siońnia rola ABSIE va ŭschodniejeŭrapiejskim rehijonie «pačynaje ŭzrastać», i heta źviazana «z hieapalityčnymi pryčynami». Pavodle jaho mierkavańnia, heta tendencyja «budzie prykmietnaja i ŭ Biełarusi», jakaja taksama źjaŭlajecca «častkaj kryzisnaha rehijonu». «U hetaj situacyi pavinna być i razumieńnie z boku ABSIE, što ciapier heta arhanizacyja maje mahčymaść paŭpłyvać na tyja pytańni, jakimi jana zajmajecca ŭ Biełarusi», — skazaŭ Bialacki.
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj32
Kamientary