Нагодай стаў пакаяльны ліст кіраўнічага органу арганізацыі у міністэрства, у якім абяцаецца даць ацэнку кіраўніку арганізацыі Анатолю Шумчанку, якога «не ўпаўнаважвалі на ўдзел у несанкцыянаванай акцыі 10 студзеня».
Міністэрства юстыцыі прыняла рашэньне адклікаць пазоў аб ліквідацыі дадзенага грамадзкага аб’яднаньня зь Вярхоўнага суда Беларусі, паведамляе БЕЛТА.
У Мін’юсьце паведамілі, што ў міністэрства паступіў зварот РГА «Пэрспэктывы», у якім яно паінфармавала, што кіраўнічыя органы не прымалі рашэньня наконт удзелу іх кіраўніка арганізацыі ў несанкцыянаванай акцыі. Шумчанка, гаворыцца ў звароце, не надзяляўся паўнамоцтвамі прадстаўляць грамадзкае аб’яднаньне на якіх-небудзь масавых мерапрыемствах, а таму 11 лютага на Радзе грамадзкага аб’яднаньня будзе дадзеная ацэнка яго дзеяньням 10 студзеня і будзе вырашана пытаньне аб сумяшчальнасьці такой дзейнасьці з пасадай кіраўніка РГА.
«У адпаведнасьці з палажэньнямі статута арганізацыі мэтамі яе дзейнасьці зьяўляюцца стварэньне ўмоваў, скіраваных на разьвіцьцё прадпрымальніцтва ў рэспубліцы, спрыяньне прыцягненьню органаў улады да праблемаў, што ўзьнікаюць. Улічваючы выкладзенае, а таксама супадзеньне мэтаў дзейнасьці дадзенага грамадзкага аб’яднаньня з курсам дзяржавы на ўмацаваньне і разьвіцьцё малога бізнэсу прынятае рашэньне аб адкліканьні зь Вярхоўнага суда позвы аб аб ліквідацыі РГА «Пэрспэктывы», паведамілі ў Мін’юсьце.
Варта адзначыць, што кіраўніка «Пэрспэктывы» Анатоля Шумчанку затрымалі пасьля заканчэньня прадпрымальніцкай акцыі 10 студзеня і асудзілі на 15 сутак арышту.
Нагадаем, што адразу пасьля заявы Мін’юсту аб намеры ліквідаваць «Пэрспэктыву», Партыя БНФ заявіла пра гатоўнасьць прыняць у свае шэрагі сябраў арганізацыі.
Раней намесьніца старшыні рады РГА «Пэрспэктыва» Вольга Круміна заявіла, што ў выпадку ліквідацыі «Пэрспэктывы» сябры арганізацыі ініцыююць стварэньне палітычнай партыі прадпрымальнікаў. У найгоршым выпадку не выключаўся варыянт далучэньня да адной з дзейных апазыцыйных палітычных арганізацыяў.
Цяпер чытаюць
Стала вядома, што за 200 тысяч еўра прапаноўвалі Сяргею Ціханоўскаму «беларускія бізнэсмены»23
Каментары