Мінулая зіма ў Беларусі ўвайшла ў дзясятку самых цёплых за час назірання
Сярэдняя тэмпература была на 3,6 градусы вышэй за норму.
З 1945 года, калі пачаліся рэгулярныя назіранні за тэмпературай у Беларусі, зіма 2014-2015 года была шостай па цеплыні.
Сярэдняя тэмпература за тры месяцы склала –1,6°C, што на 3,9 градусы вышэй за кліматычную норму, распавяла «Нашай Ніве» Алена Камароўская, начальнік аддзела клімату Гідраметцэнтра. Усе тры месяцы былі надзвычай цёплымі.
Самая нізкая тэмпература за зіму, –23,4°C, назіралася на станцыі Езярышча (Віцебская вобласць) 28 снежня. Самая высокая, +11,5°C — у Гродне 19 снежня.
Але за апошнія пяць год гэта не рэкордна цёплая зіма. У 2007-2008 годзе зіма была цяплейшая, у сярэднем тэмпература склала тады –1°C.
Ападкаў выпала 106% нормы, што нармальна. Першыя два месяцы зімы былі дастаткова вільготнымі. Але люты быў дастаткова сухі, ападкаў выпала толькі 56% нормы, 19 мм ападкаў у сярэднем па Беларусі.
Так суха ў лютым бывае раз на 12 год.
Снежнае покрыва ўсталявалася яшчэ ў сярэдзіне лістапада, але праз няўстойлівае надвор’е яно таяла і зноў утварался. Да канца зімы яно ўтрымлівалася толькі на поўначы.
Як раней адзначала Алена Уладзіміраўна, цёплыя годы ўпісваюцца ў агульную тэндэнцыю з 1989-га. Толькі 1996 год быў у Беларусі крыху халаднейшым за норму. Гэтая тэндэнцыя ў сваю чаргу ёсць часткай глабальнага пацяплення.
Па прагнозах Гідраметцэнтру, у бліжэйшыя дні па Беларусі тэмпература будзе трымацца каля нуля. У чацвер у Мінску пройдзе мокры снег, таксама вільготнымі будуць выходныя.
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»3
Каментары