Нападнік пакончыў з сабой.
У амерыканскім штаце Вірджынія падчас жывога эфіру былі застрэленыя карэспандэнтка і тэлеаператар.
24-гадовая рэпарцёрка Элісан Паркер і 27-гадовы аператар Адам Уард былі забітыя ў ходзе інтэрв'ю ў горадзе Манета, паведаміла тэлекампанія WDBJ7.
Падчас жывога эфіру было чуваць стрэлы, пасля якіх рэпарцёрка і жанчына, з якой яна гутарыла, пабеглі.
Губернатар Вірджыніі Тэры Макаліф заявіў, што, паводле яго інфармацыі, нападнік — раззлаваны супрацоўнік той жа тэлекампаніі Вестэр Лі Фланаган. «Гэта не тэрарызм. Гэта крымінальная справа», — сказаў ён.
Фланаган спрабаваў пакончыць з сабой у сваёй машыне на шашы I-66 пасля паліцэйскай пагоні, паведамляюць прадстаўнікі тэлекампаніі.
У цяжкім стане яго даставілі ў бальніцу штата Вірджынія, дзе ён неўзабаве памёр.
Паводле паведамлення тэлекампаніі, жанчына, у якой бралі інтэрв'ю, была параненая.
Напад адбыўся ў 6.45 па мясцовым часе (10.45 паводле Грынвіча) на тэрыторыі буйнога гандлёвага цэнтра Bridgewater Plaza.
Паркер пачынала інтэрв'ю, прысвечанае тэме турызму, калі прагучалі восем стрэлаў, пасля чаго камера нахілілася і ўпала на зямлю. Пры гэтым было чуваць, як рэпарцёрка крычыць. Камера зафіксавала ўцёкі падазраванага — мужчыны ў чорных штанах і цёмна-сіняй кашулі, з пісталетам у руцэ.
Крыст Хёрст, калега загінулай Элісан Паркер, напісаў у сваім твітары, што ў іх быў раман, яны толькі нядаўна з'ехаліся і збіраліся ажаніцца. 19 жніўня ёй споўнілася 24 гады.
Загінулы аператар таксама рыхтаваўся да вяселля: увесну ён зрабіў прапанову сваёй дзяўчыне Мелісе От.
Каментары