У найбуйнейшых гарадах ЗША ўзмоцнены меры бяспекі ў сувязі з серыяй тэрактаў у сталіцы Францыі. Рэжым павышанай гатоўнасці ўведзены ў першую чаргу ў Нью-Ёрку, Бостане (штат Масачусэтс), Маямі (штат Фларыда), Чыкага (штат Ілінойс), Лос-Анджэлесе (штат Каліфорнія).
Мэр Нью-Ёрка Біл дэ Блазіа распарадзіўся «выдзеліць дадатковыя рэсурсы» на ахову пастаяннага прадстаўніцтва Францыі пры ААН, генконсульства і іншых устаноў, якія маюць дачыненне да Пятай рэспублікі. У стан павышанай гатоўнасці прыведзены спецпадраздзяленне па барацьбе з тэрарызмам Упраўлення паліцыі Нью-Ёрка, асаблівая тактычная аўтагрупа і атрады «Геркулес». Як удакладніў дэ Блазіа, зусім нядаўна аўтагрупа была даўкамплектавана за кошт 400 супрацоўнікаў, і гэта далёка не ўсё, што маецца ў рэзерве і падрыхтавана пасля тэрактаў 11 верасня 2001 года.
З вечара пятніцы ўзмоцнена патруляванне ў найбольш людных месцах Манхэтэна. Так, на знакамітай Таймс-сквер выстаўлены паліцэйскія у форме, якія стаяць у перыметры металічных загарод і вядуць назіранне адначасова на 360 градусаў. Іх за межамі перыметра страхуюць іх калегі.
Па сведчанні тэлекампаніі CNN, такі фармат нясення службы ў мегаполісе яшчэ не назіралі.
«Горад пастаянна напагатове, мы вельмі цесна ўзаемадзейнічаем з нашымі федэральнымі калегамі, з міністэрствам нацыянальнай бяспекі, ФБР і г.д. Таму мы заўсёды напагатове, але кожны раз, калі адбываюцца такія тэракты, гэта служыць нам новым напамінам пра неабходнасць быць гатовымі, быць пільнымі і падстрахавацца ў месцах найбольшай верагоднасці здзяйснення тэрактаў», — заявіў мэр дэ Блазіа.
Каментары