У Крыме ўводзяць графікі адключэння электрычнасці і вады для насельніцтва, паведаміў журналістам першы віцэ-прэм'ер самаабвешчанага ўрада Крыма Міхаіл Шарамет, які ўзначаліў камісію па ліквідацыі НС.
«Веерныя адключэнні, на жаль, будуць па ўсім паўвостраве. Пазбегнуць гэтага нам не ўдасца. У бліжэйшы час усе графікі будуць даведзены да насельніцтва», — сказаў ён журналістам.
У міністэрстве паліва і энергетыкі Крыма абяцаюць даводзіць графікі адключэння да насельніцтва кожныя дзве гадзіны.
Гэтай ноччу Крым застаўся без паставак электраэнергіі з Украіны, у 00:22 ва ўсіх яго населеных пунктах пагасла святло. Паводле інфармацыі з Кіева, прычынай гэтага сталі падрывы ліній электраперадач, якія вядуць на паўвостраў.
У 01:42 ўлады Крыма ўвялі рэжым надзвычайнай сітуацыі. Усе сацыяльныя аб'екты паўвострава падлучаныя да рэзервовых крыніц сілкавання.
Каментары