Абама узняў тост за скандынаўскія нацыі на незвычайным саміце ў Вашынгтоне
Прэзідэнт ЗША Барак Абама узняў тост за Швецыю, Нарвегію, Данію, Фінляндыю і Ісландыю на незвычайнай званай вячэры ў Белым Доме. Яна была арганізаваная з нагоды саміта ЗША — Скандынавія, на які сабраліся кіраўнікі шасці дзяржаў.
Цэнтральнай тэмай саміта была абарона ад расійскай пагрозы.
Аднак саміт стаў для Абамы нагодай выказаць сваё даўняе захапленне палітыкай скандынаўскіх краін — прагматычнай і гуманістычнай адначасова.
Вячэра была натхнёная матывамі скандынаўскай кухні. Падавалі сыры гавайскі тунец, таматны тартар і цялячыя рабрынкі, печаныя з чырвоным віном. На вячэру сабраўся цвет Галівуда і амерыканскай культуры, а разам з імі кіраўнікі перадавых амерыканскіх кампаній з топ-500.
На саміце Данія і Нарвегія заявілі, што яны зробяць свой унёсак ва «ўзмоцненыя перадавыя сілы» НАТА, а Абама сказаў: «Мы будзем падтрымліваць сталы дыялог і шукаць супрацоўніцтва з Расіяй, але мы хочам таксама быць пэўнымі, што мы падрыхтаваныя і моцныя, і мы таксама хочам дабіцца, каб вайсковая актыўнасць Расіі заставалася ў поўнай адпаведнасці з міжнароднымі забавязаннямі», — сказаў Абама пасля саміта.
Пяць скандынаўскіх краін разам, калі сплюсаваць з імі саюзныя ім краіны Балтыі і Польшчу, маюць каля 68 мільёнаў насельніцтва. У Расіі — каля 140 мільёнаў. Аб'ём жа эканомік гэтай групы краін сувымерны з эканомікай Расіі. Нарвегія мае вялізны суверэнны грашовы фонд, а Швецыя — развітую вайсковую прамысловасць. Польшча і Фінляндыя маюць досвед паспяховай абароны ад Савецкай Расіі ў ХХ ст. З усіх гэтых краін Швецыя і Фінляндыя не ўваходзяць у НАТА, але абмяркоўваюць ідэю далучэння.
У абаронным плане самае ўразлівае месца альянса — Балтыя, вузкая палоска краін на беразе Балтыйскага мора. У Эстоніі і асабліва Латвіі Масква можа, акрамя таго, разлічваць на сваю «пятую калону». Крэмль таксама фінансуе ультраправыя і ультралевыя партыі і асяродкі ў іншых краінах рэгіёна.
Каментары