У панядзелак, 27 чэрвеня 2016 года, кіраўніцтва Беларускай калійнай кампаніі ў Нью-Дэлі паспяхова завяршыла перамовы з доўгатэрміновым стратэгічным партнёрам БКК у Індыі, кампаніяй IPL. Падпісаны кантракт на пастаўку калійных угнаенняў на індыйскі рынак на 2016—2017 фінансавы год па цане 227 даляраў за тону CFR на ўмовах 180-дзённай адтэрміноўкі, паведаміла прэс-служба БКК.
У мінулым годзе пастаўкі ажыццяўляліся па цане 332 даляры за тону.
Цвёрдыя аб'ёмы да пастаўкі складаюць 700 тысяч тон. Адгрузкі прадукцыі па новай цане пачнуцца з 1 ліпеня 2016 года.
«Падпісанне гэтага пагаднення будзе спрыяць падтрыманню стабільнасці індыйскага рынку, які з'яўляецца для нас важным стратэгічным кірункам. Кантракт адлюстроўвае інтарэсы і вытворцаў, і імпарцёраў, і канчатковых спажыўцоў калійных угнаенняў — індыйскіх фермераў, якія ўносяць істотны ўклад у развіццё сусветнай сельскай гаспадаркі», — заявіла генеральны дырэктар Беларускай калійнай кампаніі Алена Кудравец.
У паведамленні адзначана, што «вызначаная новым кантрактам цана з'яўляецца справядлівай, адлюстроўвае бягучую кан'юнктуру на сусветным калійным рынку». «Заключэнне пагаднення з IPL стане, без сумневу, адным з вызначальных фактараў развіцця галіны, акажа пазітыўны ўплыў на ўвесь сусветны калійны рынак ужо ў найбліжэйшы час, надасць упэўненасці ўсім яго ўдзельнікам, прастымулюе попыт на калійныя ўгнаенні», — лічаць у БКК.
«Добры кошт, — пракаментаваў кантракт аналітык Raiffeisenbank Канстанцін Юмінаў. — Усё, што вышэйшае за 220 даляраў за тону, — вельмі добрая цана з улікам таго, што гэта супастаўна з ніжнім узроўнем спотавых цэн у Паўднёва-Усходняй Азіі і без дадатковых дысконтаў».
Ён дадаў, што кошт можна лічыць добрым менавіта ў цяперашніх негатыўных рынкавых умовах і пры наяўных праблемах. «Гэты ўзровень коштаў дазволіць падпісаць кітайскі кантракт вышэй за 200 даляраў за тону, што важна з улікам таго, што Кітай хацеў цану на ўзроўні 180 даляраў», — адзначыў Юмінаў.
Прэзідэнт Беларусі Аляксандр Лукашэнка праанансаваў падпісаны калійны кантракт з Індыяй на мінулым тыдні, выступаючы на Усебеларускім сходзе.
У гэтым годзе кантракт з Індыяй быў падпісаны раней, чым з Кітаем, і чакалі яго з асаблівай увагай. У пачатку года з-за зніжэння коштаў на калійным рынку Беларусь прыкметна недабрала ў экспартных аб'ёмах па гэтым ключавым артыкуле. За тры месяцы экспартныя пастаўкі калійных угнаенняў у грошах аселі на 35,3%, склаўшы 412,4 млн даляраў. У параўнанні з аналагічным перыядам мінулага года Беларусь недаатрымала 224,9 млн даляраў. У натуральным выражэнні Беларусь па выніках трох месяцаў знізіла пастаўкі на 22,9%, да 995,4 тысячы тон (у пераліку на чыстае ўтрыманне К2О).
Каментары