U paniadziełak, 27 červienia 2016 hoda, kiraŭnictva Biełaruskaj kalijnaj kampanii ŭ Ńju-Deli paśpiachova zaviaršyła pieramovy z doŭhaterminovym stratehičnym partnioram BKK u Indyi, kampanijaj IPL. Padpisany kantrakt na pastaŭku kalijnych uhnajeńniaŭ na indyjski rynak na 2016—2017 finansavy hod pa canie 227 dalaraŭ za tonu CFR na ŭmovach 180-dzionnaj adterminoŭki, paviedamiła pres-słužba BKK.
U minułym hodzie pastaŭki ažyćciaŭlalisia pa canie 332 dalary za tonu.
Ćviordyja abjomy da pastaŭki składajuć 700 tysiač ton. Adhruzki pradukcyi pa novaj canie pačnucca z 1 lipienia 2016 hoda.
«Padpisańnie hetaha pahadnieńnia budzie spryjać padtrymańniu stabilnaści indyjskaha rynku, jaki źjaŭlajecca dla nas važnym stratehičnym kirunkam. Kantrakt adlustroŭvaje intaresy i vytvorcaŭ, i imparcioraŭ, i kančatkovych spažyŭcoŭ kalijnych uhnajeńniaŭ — indyjskich fiermieraŭ, jakija ŭnosiać istotny ŭkład u raźvićcio suśvietnaj sielskaj haspadarki», — zajaviła hienieralny dyrektar Biełaruskaj kalijnaj kampanii Alena Kudraviec.
U paviedamleńni adznačana, što «vyznačanaja novym kantraktam cana źjaŭlajecca spraviadlivaj, adlustroŭvaje biahučuju kanjunkturu na suśvietnym kalijnym rynku». «Zaklučeńnie pahadnieńnia z IPL stanie, biez sumnievu, adnym z vyznačalnych faktaraŭ raźvićcia haliny, akaža pazityŭny ŭpłyŭ na ŭvieś suśvietny kalijny rynak užo ŭ najbližejšy čas, nadaść upeŭnienaści ŭsim jaho ŭdzielnikam, prastymuluje popyt na kalijnyja ŭhnajeńni», — ličać u BKK.
«Dobry košt, — prakamientavaŭ kantrakt analityk Raiffeisenbank Kanstancin Juminaŭ. — Usio, što vyšejšaje za 220 dalaraŭ za tonu, — vielmi dobraja cana z ulikam taho, što heta supastaŭna ź nižnim uzroŭniem spotavych cen u Paŭdniova-Uschodniaj Azii i biez dadatkovych dyskontaŭ».
Jon dadaŭ, što košt možna ličyć dobrym mienavita ŭ ciapierašnich niehatyŭnych rynkavych umovach i pry najaŭnych prablemach. «Hety ŭzrovień koštaŭ dazvolić padpisać kitajski kantrakt vyšej za 200 dalaraŭ za tonu, što važna z ulikam taho, što Kitaj chacieŭ canu na ŭzroŭni 180 dalaraŭ», — adznačyŭ Juminaŭ.
Prezident Biełarusi Alaksandr Łukašenka praanansavaŭ padpisany kalijny kantrakt ź Indyjaj na minułym tydni, vystupajučy na Usiebiełaruskim schodzie.
U hetym hodzie kantrakt ź Indyjaj byŭ padpisany raniej, čym z Kitajem, i čakali jaho z asablivaj uvahaj. U pačatku hoda z-za źnižeńnia koštaŭ na kalijnym rynku Biełaruś prykmietna niedabrała ŭ ekspartnych abjomach pa hetym klučavym artykule. Za try miesiacy ekspartnyja pastaŭki kalijnych uhnajeńniaŭ u hrošach asieli na 35,3%, skłaŭšy 412,4 młn dalaraŭ. U paraŭnańni z anałahičnym pieryjadam minułaha hoda Biełaruś niedaatrymała 224,9 młn dalaraŭ. U naturalnym vyražeńni Biełaruś pa vynikach troch miesiacaŭ źniziła pastaŭki na 22,9%, da 995,4 tysiačy ton (u pieraliku na čystaje ŭtrymańnie K2O).
Kamientary