Беларусы змогуць паступаць у польскія ВНУ паводле асобнага конкурсу
Беларусь і Польшча падпісалі пагадненне аб супрацоўніцтве ў сферы адукацыі. Яно прадугледжвае абмен студэнтамі і выкладчыкамі на парытэтных асновах, а таксама стажыроўкі за кошт дзяржавы, распавёў міністр адукацыі Міхаіл Жураўкоў у «Галоўным эфіры» на «Беларусь-1».
— Ёсць прамыя пагадненні паміж універсітэтамі Польшчы і Беларусі. Пагадненне ж паміж нашымі краінамі больш выразна рэгламентуе колькасць студэнтаў і працягласць іх стажыровак. Стажыроўка для 12 студэнтаў будзе доўжыцца да пяці месяцаў. Калі колькасць студэнтаў памяншаецца, павялічыцца працягласць іх стажыроўкі,— расказаў Міхаіл Жураўкоў.
Пры гэтым міністр адзначыў, што стажыравацца студэнты ў Польшчы будуць за дзяржаўны кошт.
Акрамя таго, пагадненне дае права беларусам і палякам паступаць ва ўніверсітэты Польшчы і Беларусі на бясплатнай аснове. Студэнты, якія падаюць дакументы на навучанне, не ўдзельнічаюць у агульным конкурсе абранай імі навучальнай установы. Іх заяўку разгледзяць, камісія правядзе сумоўе на веданне прадмета і нацыянальнай мовы.
Колькасць месцаў для абітурыентаў кожны год будзе вызначацца на сумесным пасяджэнні прадстаўнікоў міністэрстваў адукацыі.
Акрамя гэтага, да 20 студэнтаў, якія навучаюцца на першай і другой ступені ў Беларусі, змогуць працягнуць сваё навучанне ў Польшчы і вярнуцца назад.
Пытанні, звязаныя са стажыроўкай педагогаў, будзе вырашаць спецыяльная камісія, куды ўвойдуць прадстаўнікі польскага і беларускага бакоў. Стажыроўкі для выкладчыкаў будуць доўжыцца да месяца. У групу будзе набірацца па 10-15 чалавек.
У пагадненні таксама прапісана, што бакі будуць удасканальваць змест школьных падручнікаў гісторыі.
— Паміж нашымі краінамі існуюць вельмі цесныя гістарычныя ўзаемасувязі, шмат пераплецена падзей, шмат гістарычных асоб нават цяжка ідэнтыфікаваць — беларусы яны або палякі. Таму мы дамовіліся, што гісторыкі, кампетэнтныя прафесары будуць разам вызначаць змест пэўных раздзелаў гісторыі, каб карэктна выкладаць гістарычныя падзеі. Навукоўцы будуць дзяліцца дакументальнымі фактамі, каб больш карэктна падаць пэўныя гістарычныя факты нашай супольнай гісторыі, - сказаў Міхаіл Жураўкоў.
Міністр адзначыў, што гэта не першае міжнароднае пагадненне ў сферы адукацыі, а «яшчэ адзін добры штрых у багатай міжнароднай дзейнасці нашай сістэмы адукацыі, каб павышаць свой прафесійны ўзровень».
Каментары