Назіральнік у Мінску выявіў у празрыстай скрыні тоўсты і роўны стос дакінутых бюлетэняў
Ён лічыць, што такі грубы ўкід быў здзейснены таму, што ён увесь час пільнаваў скрыню, і начальніца камісіі спяшалася, пакуль ён выйшаў пагаварыць па тэлефоне.
Завесці крымінальную справу патрабуе назіральнік Яраслаў Навуменка па факце масавага ўкіду бюлетэняў на ўчастку №625 Каліноўскай выбарчай акругі №108 Мінска. Адпаведную скаргу назіральнік накіраваў у акруговую камісію, у РУУС і пракуратуру Першамайскага раёна сталіцы.
Назіральнік кампаніі «Права выбару-2016» ад «Руху «За свабоду» сцвярджае, што 9 верасня ў прысутнасці сябраў камісіі пад старшынствам Валерыя Мялешкі і сакратара Таццяны Трубчык у скрыню для датэрміновага галасавання ўкінуты фальсіфікаваныя бюлетэні ў вялікай колькасці.
«Перад абедзеным перапынкам ў мяне выклікала падазрэнне, што ў скрыні ёсць прыціснутыя адзін да аднаго ў выглядзе шчыльнага стоса бюлетэні, чаго не можа быць пры адзінкавым укідванні бюлетэняў выбаршчыкамі. На гэта была звернута ўвага старшыні камісіі Мялешкі, ад якога зразумелага адказу не было пачута», - піша назіральнік.
9 верасня па падліках Яраслава Навуменкі на ўчастак прыйшлі 42 выбаршчыкі. Пры агалошванні вынікаў галасавання пасля закрыцця ўчастка ў 19-00 камісія назвала іншую колькасць бюлетэняў - 228. Ізноў у скрыні для галасавання з'явіўся шчыльны стос бюлетэняў.
7 верасня назіральнік таксама зафіксаваў разыходжані ў лічбах, аднак патлумачыць іх не здолеў. 7 верасня камісія налічыла 45 бюлетэняў супраць налічаных назіральнікам 34, а 8 верасня - 45 супраць 27.
«Даказаць фальсіфікацыю можна, параўнаўшы спісы прагаласаваўшых з колькасцю бюлетэняў у скрыні», - адзначае назіральнік.
Яраслаў Навуменка ўвесь працоўны час знаходзіцца на ўчастку, выходзячы за ягоныя межы толькі пры размове па тэлефоне, але пры гэтым не выпускае ўваходныя дзверы з поля зроку.
Назіральнік просіць прыцягнуць да крымінальнай адказнасці вінаватых.
Каментары