28 лістапада на аэрадроме ў Мачулішчах асабістаму складу 50-й змешанай авіябазы ўручылі фармуляры ад шасці найноўшых верталётаў Мі-8МТВ-5, паведамляе БелаПАН.
Гэтыя верталёты з'яўляюцца першай партыяй у рамках кантракту на пастаўку дванаццаці машын. Кантракт быў падпісаны з прадстаўнікамі холдынгу «Верталёты Расіі» падчас міжнароднага ваенна-тэхнічнага форуму «Армія-2015».
Як паведаміў на ўрачыстай цырымоніі міністр абароны Беларусі генерал-лейтэнант Андрэй Раўкоў, яшчэ шэсць верталётаў павінны быць пастаўленыя ў Беларусь у канцы мая — пачатку чэрвеня 2017 года. Звяртаючы ўвагу асабістага складу авіябазы на новыя машыны, Раўкоў сказаў: «На іх нам трэба будзе выконваць задачы ў мірны час і ў выпадку ваеннага часу — на іх ваяваць».
Вельмі важнай падзеяй для верталётабудаўнікоў Расіі назваў пастаўку ў Беларусь новай ваеннай тэхнікі генеральны дырэктар холдынгу «Верталёты Расіі» Аляксандр Міхееў. Паводле яго слоў, гэтыя верталёты на сёння з'яўляюцца найлепшымі ўзорамі верталётнай тэхнікі, вырабленай на Казанскім верталётным заводзе. Міхееў запэўніў Раўкова, што кантрактныя абавязацельствы расійскі бок выканае ў тэрмін.
Новая мадыфікацыя верталёта у адрозненне ад Мі-8МТ абсталяваная сучасным комплексам пілатажна-навігацыйнага, радыёсувязнога і мэтавага абсталявання. Машына прызначана для вырашэння баявых і транспартных задач. Павялічаны аб'ём грузавой кабіны, колькасць пасадачных месцаў павялічылася на траціну, што дазваляе выконваць дэсантаванне да 35 дэсантнікаў і транспарціроўку суправаджэння медперсаналу да 12 параненых.
Верталёт абсталяваны сістэмай беспарашутнага дэсантавання, якая дазваляе ажыццяўляць адначасовы спуск чатырох чалавек. Ён таксама здольны выконваць задачы днём і ноччу, на малых вышынях, у складаных метэаралагічных умовах, а таксама прызямляцца і ўзлятаць з неабсталяваных пляцовак.
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку16
Каментары