Адна з галоўных тэмаў абмеркавання ў расійскіх СМІ — заблытаная гісторыя ўзаемаадносінаў 68-гадовага ілжэманаха Нікіфара і 18-гадовай шахматысткі Марыі.
Летась іркуцкая сям’я Дарагавоз адправілася на адпачынак у акупаваны Крым. У царкве мястэчка Берагавое яны пазнаёміліся з дзіўным чалавекам у адзенні манаха, які прадставіўся як Нікіфар.
Пасля вяртання ў Іркуцк непаўналетняя Марыя Дарагавоз працягнула камунікацыю з крымскім святаром. «Мы лічылі, што пагутарыць з манахам будзе карысна. Кожны дзень хвілін па 20», — тлумачыць яе маці. Аднак урэшце высвятлілася, што размовы працягваліся гадзінамі па начах.
Дзяўчына закінула шахматы, хоць уваходзіла ў абласную зборную.
А ў красавіку 2016 года падчас паездкі на спаборніцтвы дзяўчына збегла з аэрапорта. Знайшлі яе ў Сімферопалі, у Нікіфара. Паліцыя вярнула яе дахаты, але праз месяц Марыя зноў уцякла.
На сваёй старонцы ў сацыяльнай сетцы яна назвала бацькоў сатаністамі і абвінаваціла ў сэксуальных дамагальніцтвах. А пасля прапала зусім.
У пошуках дачкі Дарагавозы пераехалі ў Крым. Выявілася, што Нікіфар ніякім святаром не быў — а проста працаваў вартаўніком у храме. Мясцовыя жыхары звярталі ўвагу на яго дзіўныя паводзіны, напрыклад, мужчына спаў… у труне.
Нікіфар расказваў знаёмым, што ў савецкія часы працаваў журналістам, а пасля нібыта быў асуджаны за палітычныя перакананні.
Даведаўшыся пра прыезд бацькоў маладой шахматысткі, Нікіфар уцёк разам з дзяўчынай. Яны абвешчаныя ў вышук.
Цяпер чытаюць
Бліжэйшым часам будуць вызвалены больш за 150 палітзняволеных32
Каментары