Міністр замежных спраў Беларусі Уладзімір Макей заклікаў дыпламатаў аднавіць і ўмацаваць узровень даверу паміж краінамі.Пра гэта ён заявіў на традыцыйнай сустрэчы з акрэдытаванымі ў краіне кіраўнікамі дыпламатычных прадстаўніцтваў і прадстаўніцтваў міжнародных арганізацый з нагоды навагодніх і калядных святаў.
«Я хацеў бы, каб мы аднавілі той узровень даверу, які быў хаця б некаторы час таму, і ўмацавалі гэты давер — давер у свеце, давер паміж нашымі краінамі, давер паміж нашымі народамі. Мы ў Беларусі будзем працаваць толькі ў гэтым напрамку. Мы заўсёды гатовы не ствараць праблемы, а ўносіць свой уклад у стваральны працэс», — сказаў Уладзімір Макей.
Ён падзякаваў дыпламатам за тое, што прынялі запрашэнне прыняць удзел у сустрэчы. «Год быў цяжкі і неадназначны. Так, у нас фінансава-эканамічны крызіс. Ёсць праблемы, але я думаю, што мы іх паспяхова пераадолеем», — адзначыў ён.
Міністр падкрэсліў і пазітыўныя падзеі, у ліку якіх - зняцце з Беларусі большасці санкцый, а таксама паспяховае правядзенне парламенцкіх выбараў. «Але нам не патрэбна супакойвацца, таму што апошняя сустрэча міністраў замежных спраў у Гамбургу паказала, што прорва недаверу паміж краінамі на сённяшні дзень вялікая. На мой погляд, самая вялікая праблема — адсутнасць даверу. Я ўспамінаю словы былога прэзідэнта Германіі Ёханеса Рау. Ён сказаў, што там, дзе адсутнічае давер, кіруюць няўпэўненасць і нават страх, а страх перад будучым - гэта самы надзейны шлях для таго, каб мы прайгралі гэта будучае. Абсалютна правільныя і важныя словы», — лічыць Уладзімір Макей.
Сустрэча Уладзіміра Макея і жонкі з акрэдытаванымі ў краіне кіраўнікамі дыпламатычных прадстаўніцтваў і прадстаўніцтваў міжнародных арганізацый з жонкамі з нагоды навагодніх і калядных свят прайшла ў СТАА «Ювелірны завод «Зорка». «Мы хацелі б, каб вы пазнаёміліся з часцінкай культуры Беларусі, з эканамічным патэнцыялам», — сказаў ён.
Святочную атмасферу вечара стварыла выступленне струннага квартэта «Альта», хору Voca band і камернага аркестра Elite Orchestra. Мэтай традыцыйных навагодніх сустрэч, якія праводзяцца з 2013 года, з'яўляецца папулярызацыя гістарычнай спадчыны, а таксама эканамічнага патэнцыялу і культурных традыцый Беларусі.
Каментары