Міністэрства абароны Кітая верне уладам ЗША падводны даследчы беспілотнік, які належыць амерыканскаму акіянаграфічнаму караблю USNS Bowditch. Пра гэта гаворыцца ў заяве на сайце кітайскага мінабароны, перадае Бі-бі-сі.
Беспілотнік трапіў да кітайскіх ВМС 15 снежня. Інцыдэнт адбыўся ў Паўднёва-Кітайскім моры, на адлегласці ў 50 марскіх міль (больш за 90 км) на паўночны захад ад філіпінскага заліва Субік-Бэй.
USNS Bowditch праводзіў у гэтым раёне даследаванні, паведамляюць у ЗША. Пад ваду быў спушчаны даследчы беспілотнік.
Улады КНР заявілі, што вайскоўцы з кітайскага карабля заўважылі невядомы падводны аб'ект і вырашылі падняць яго, каб прадухіліць небяспечную сітуацыю. Толькі потым вайскоўцы заўважылі, што гэта амерыканскі беспілотнік, сцвярджаюць кітайскія ўлады.
Мінабароны КНР не гаворыць адкрыта, ці знаходзіўся беспілотнік ў водах, якія Кітай лічыць сваімі. У заяве толькі выказваецца пратэст супраць даследчай працы амэрыканскіх самалётаў і судоў паблізу кітайскіх вод.
У заяве мінабароны КНР гаворыцца, што амерыканскі і кітайскі бакі былі на сувязі з нагоды гэтага інцыдэнту з самага пачатку. Кітай адразу вырашыў вярнуць беспілотнік, але заявы з боку ЗША пачалі нагнятаць сітуацыю, сцвярджае мінабароны КНР.
ЗША сцвярджаюць, што даследчыкі дзейнічалі законна. Неназваны чыноўнік заявіў Ройтэрз, што беспілотнік выконваў ваенныя даследаванні і на ім было напісана па-англійску, што яго нельга выцягваць з вады і што гэта ўласнасць ЗША.
Афіцыйна амерыканскія ўлады паведамляюць, што беспілотнікам кіраваў цывільны падрадчык, які праводзіць акіянаграфічнае даследаванне. USNS Bowditch ўваходзіць у склад ВМС ЗША.
«Ён [беспілотнік] наш, і на ім гэта ясна напісана. Мы б хацелі вярнуць яго і хацелі б, каб такое больш не здаралася», — заявіў на брыфінгу прэс-сакратар Пентагону Джэф Дэвіс.
Інцыдэнт таксама пракаментаваў абраны прэзідэнт ЗША Дональд Трамп. Ён напісаў у «Твітэры», што Кітай скраў беспілотнік. Трамп таксама зрабіў памылку друку і назваў тое, што адбылося «беспрэзідэнтным актам». Пасля ён выдаліў гэты твіт і апублікаваў новы — без памылкі.
Захоп беспілотніка — самы сур'ёзны ваенны інцыдэнт паміж ЗША і Кітаем за апошнія 15 гадоў. Да гэтага ў 2001 годзе ў паветры сутыкнуліся амерыканскі самалёт-шпіён і кітайскі знішчальнік. У выніку кітайскі пілот загінуў.
КНР прэтэндуе на вялікую частку астравоў і рыфаў у Паўднёва-Кітайскім моры. Іншыя краіны ў рэгіёне з гэтым нязгодныя. Кітайскія ўлады таксама разгарнулі маштабны праект па пашырэнні невялікіх астравоў архіпелага Спратлі. На гэтых астравах КНР размяшчае ваенную інфраструктуру.
Асудзілі мазырскага блогера Union Bell. Хлопец некалькі гадоў хаваўся, але пасля арышту бацькі быў вымушаны звярнуцца ў бальніцу8
Асудзілі мазырскага блогера Union Bell. Хлопец некалькі гадоў хаваўся, але пасля арышту бацькі быў вымушаны звярнуцца ў бальніцу
«Я супраць. Мовы, якія пакінулі пасля сябе каланізатары ў Афрыцы, сталі шляхам да цывілізацыі». Алексіевіч адказала, як ставіцца да адмовы ад рускай мовы ва Украіне8888
Каментары