Праз два тыдні ў судзе Маскоўскага раёна Мінска распачнецца разгляд крымінальнай справы актывіста анархісцкага руху Вячаслава Касінерава, якога пераследуюць за перфоманс са статуяй паліцэйскага-гарадавога каля будынка МУС.
Разбіральніцтва па справе актывіста, якое распачнецца а 10-й гадзіне 27 красавіка, будзе весці суддзя Аляксандр Петраш, які ўжо «засвяціўся» ў нядаўніх адміністратыўных працэсах па справах затрыманых падчас мірнай акцыі ў Дзень Волі.
Да суда Вячаслаў Касінераў утрымліваецца пад вартай у СІЗА №1 ГУУС Мінгарвыканкама, паколькі 6 красавіка суд Маскоўскага раёна Мінска, разгледзеўшы ў закрытым рэжыме скаргу актывіста на прызначаную меру стрымання, адмовіўся яго вызваліць пад падпіску аб нявыездзе.
Тым часам праваабарончая супольнасць Беларусі заявіла, што расцэньвае крымінальны пераслед Касінерава як непрапарцыйна жорсткую рэакцыю ўладаў на яго ўчынак, абумоўленую помстай органаў міліцыі. Заключэнне пад варту і магчымае далейшае пазбаўленне волі праваабаронцы лічаць празмернымі і скіраванымі на ізаляцыю актывіста з мэтай спынення ягонай публічнай дзейнасці. 5 красавіка праваабарончыя арганізацыі выступілі з заявай аб прызнанні Вячаслава Касінерава палітычным зняволеным і патрабуюць ад уладаў Беларусі спынення крымінальнага пераследу і яго неадкладнага вызвалення.
Вячаславу Касінераву прад’яўлена абвінавачванне ў здзяйсненні злачынства па частцы 1 артыкула 339 Крымінальнага кодэкса (хуліганства) за праведзены ім 12 сакавіка 2017 г. каля будынку МУС перформанс, падчас якога ён накінуў пятлю на ўсталяваную там статую паліцэйскага-гарадавога, выказаўшы такім чынам свой пратэст супраць міліцэйскага самавольства і пераследу актывістаў анархісцкага руху за ўдзел у мірных акцыях пратэсту.
Цяпер чытаюць
Начальнік міліцыі Брагіна страляў у сваю жонку. Яна цудам выжыла7
Каментары