Жыхара Магілёва Аляксея Кузьміна прызналі вінаватым у парушэньні правілаў дарожнага руху і абавязалі сплаціць палову базавай велічыні (11,5 рубля) штрафу. Прычына — бела-чырвона-белая налепка на машыне. Сваёй віны кіроўца не прызнае і зьбіраецца пакараньне абскарджваць.
16 красавіка апоўначы Аляксея спыніў супрацоўнік ДАІ за перавышэньне хуткасьці. У ходзе праверкі дакумэнтаў і самой машыны на яго было складзена некалькі пратаколаў, у тым ліку за бела-чырвона-белую налепку зь літарамі «BY». Інспэктар аргумэнтаваў прэтэнзіі, што налепка «неўстаноўленага» ўзору. Паводле міліцыянта, яна мае быць чорна-белай.
«Я лічу, што міліцыянт прычапіўся да налепкі, бо яму не спадабаліся колеры, — кажа Аляксей. — Калі б налепка была чырвона-зялёнай, то і прэтэнзіяў не было б. Безумоўна, гэтая сытуацыя мяне абурае. Пра такога роду інцыдэнты мяне ў краме не папярэджвалі».
Пераканаць інспэктара ў тым, што налепка набытая ў Беларусі, не парушае правілаў, Аляксей ня змог, і яго выклікалі на разгляд пратаколаў у Магілёўскае абласное ўпраўленьне дзяржаўнай аўтаінспэкцыі.
Яго супрацоўнікі спаслаліся на 13-ю частку артыкулу 194 Правілаў дарожнага руху, паводле якога да дарожнага руху дапускаюцца транспартныя сродкі «з вонкава бачнымі налепкамі (выявамі)», якія адпавядаюць вызначаным узорам. Іншая сымболіка прыраўноўваецца да рэклямы, якую трэба рэгістраваць.
«Палітычныя бакі тут ніякія не закранаюцца. Мы займаемся выключна пытаньнямі гарантаваньня бясьпекі дарожнага руху. Вы кіроўца, і павінны трымацца правілаў», — зазначыў адзін з супрацоўнікаў упраўленьня ДАІ.
Аляксей не пагадзіўся з пакараньнем і заявіў, што яго будзе абскарджваць. Ён лічыць абразьлівым для сябе, калі па горадзе разьяжджае нямала машын з «георгіеўскімі стужкамі» на бартах, якіх ДАІ не заўважае.
«Налепка «BY» на маёй машыне такой жа формы, як у кніжцы, якую паказвалі мне ў ДАІ. У яе толькі іншы колер. Я перакананы, што ён не забаронены. Будзем абскарджваць гэтае рашэньне разам з праваабаронцамі. Яны, думаю, мне дапамогуць», — сказаў пасьля разгляду пратаколу Аляксей Кузьмін.
У менскай краме «Symbal.by» адзначылі, што прэтэнзіяў да бела-чырвона-белых налепак не было. Яны карыстаюцца попытам, і ў сталіцы нямала машын з такімі знакамі. Што да выпадку ў Магілёве, то, як адзначылі ў краме, яго варта разглядаць як выключэньне з агульнай сытуацыі.
Цяпер чытаюць
Нежывым знойдзены ў Варшаве Зміцер Каспяровіч — 43-гадовы былы палітвязень, завербаваны КДБ3
Каментары