Кітай адкрывае свой рынак для беларускай ялавічыны, паведаміў БЕЛТА начальнік галоўнага ўпраўлення знешнеэканамічнай дзейнасці Міністэрства сельскай гаспадаркі і харчавання Аляксей Багданаў.
«Сёння ў ходзе сустрэчы міністра сельскай гаспадаркі і харчавання Беларусі Леаніда Зайца і міністра галоўнага дзяржаўнага ўпраўлення КНР па кантролі якасці, інспекцыі і каранціне Чжы Шупіна было парафіравана пагадненне, якое дазваляе пастаўкі беларускай ялавічыны на кітайскі рынак. Пасля завяршэння некаторых фармальнасцей яно будзе падпісана ў ходзе афіцыйнага візіту кіраўніка кітайскага ветэрынарнага ведамства ў Мінск 7-12 ліпеня», — паведаміў Аляксей Багданаў.
У кастрычніку 2016 года спецыялісты галоўнага дзяржаўнага ўпраўлення па кантролі якасці, інспекцыі і каранціне КНР правялі аўдыт чатырох беларускіх перапрацоўчых прадпрыемстваў: Брэсцкага мясакамбіната, Гродзенскага мясакамбіната, Магілёўскага мясакамбіната і «Вялес-Міт». Як растлумачылі ў міністэрстве, па выніках праверкі праводзілася работа па прывядзенні некаторых тэхналагічных працэсаў на вытворчасці і ветэрынарнай дакументацыі ў адпаведнасць з кітайскімі патрабаваннямі. Цяпер усе работы завершаны і поўнасцю задавольваюць кітайскі бок.
Беларусь з'яўляецца найбуйнейшым экспарцёрам ялавічыны на постсавецкай прасторы, пастаўляючы больш як 135 тыс.т ялавічыны ў год. Займае 7-ы радок у сусветным рэйтынгу экспарцёраў ахалоджанай ялавічыны. У 2016 годзе беларуская ялавічына пастаўлялася на рынкі 10 краін.
«З адкрыццём кітайскага рынку мы зможам у значным аб'ёме дыверсіфікаваць наш экспарт, прычым цана на кітайскім рынку на ялавічыну даволі высокая. Вядома, наперадзе шмат работы па выбудоўванні гандлёвых ланцужкоў з кітайскімі партнёрамі, у бліжэйшы год мы плануем выйсці на пастаўкі ялавічыны ў аб'ёме каля 20 тыс.т. Наступны крок з боку Мінсельгасхарча — гэта сертыфікацыя беларускіх птушкафабрык», — дадаў Аляксей Багданаў.
Цяпер чытаюць
Жонка Статкевіча расказала, пра што паспела паразмаўляць з ім16
Каментары