Адзін з самых шуканых італьянскіх мафіёзі Рока Марабіта, які хаваўся ад праваахоўных органаў на працягу 23 гадоў, арыштаваны ва Уругваі, піша ВВС.
Паліцыя арыштавала 50-гадовага Марабіта, аднаго з босаў злачыннай групоўкі Ндрангета, у гатэлі сталіцы Уругвая, Монтэвідэа.
Паводле даных паліцыі, Марабіта, пакуль яго шукала італьянская паліцыя, жыў у курортным горадзе Пунта-дэль-Эстэ, карыстаючыся падробленым пашпартам. Улады Уругвая сцвярджаюць, што Марабіта пражыў у Пунта-дэль-Эстэ больш за 10 гадоў.
У Італіі Марабіта абвінавачваюць у арганізацыі мафіёзнай групоўкі і кантрабандзе наркотыкаў.
Марабіта, які адказваў за кантрабанду наркотыкаў з Паўднёвай Амерыкі ў Італію, называлі «какаінавым каралём Мілана».
Групоўка Ндрангета кантралюе значную частку гандлю какаінам. Паводле даных паліцыі, Марабіта адказны за кантрабанду як мінімум некалькіх соцень кілаграмаў какаіну з Бразіліі ў Італію.
У ходзе ператрусу дома Рока Марабіта ў Пунта-дэль-Эстэ паліцыя канфіскавала вінтоўку калібра 9 мм, 13 мабільных тэлефонаў, а таксама 150 фатаграфій Марабіта для пашпарта — на многіх з гэтых фатаграфій знешнасць мафіёзі была значна змененая.
Таксама паліцыя затрымала жонку мафіёзі.
Па словах адваката Марабіта, яго падабаронны з 1994 года жыў звычайным жыццём і не быў звязаны з крымінальным светам.
Цяпер Рока Марабіта застаецца ва Уругваі пад вартай. Ва Ургугваі яго вінавацяць у падробцы дакументаў. Як чакаецца, на працягу некалькіх месяцаў Марабіта будзе экстрадаваны ў Італію.
У студзені мінулага года італьянская паліцыя затрымала на поўдні краіны двух лідараў Ндрангеты — Джузэпэ Ферара і Джузэпэ Крэа, якія былі ў бягах на працягу 18 гадоў.
Цяпер чытаюць
Бліжэйшым часам будуць вызвалены больш за 150 палітзняволеных6
Каментары