Былы галоўны стратэг Белага дома Стыў Бэнан «пазбавіўся розуму», пасля таго як страціў працу ў Белым доме, заявіў прэзідэнт ЗША Дональд Трамп.
Трамп абрынуўся з абвінавачваннямі на Бэнана за тое, што той — як сцвярджаецца ў яшчэ не апублікаванай пакуль кнізе — назваў сустрэчу паміж сынам Трампа і групай расейцаў напярэдадні выбараў «здрадай».
На сустрэчы ў чэрвені 2016 года, за некалькі месяцаў да прэзідэнцкіх выбараў у ЗША, расіяне прапанавалі Дональду Трампу-малодшаму кампрамат на Хілары Клінтан.
Кніга напісана па выніках больш чым 200 інтэрв'ю з самім прэзідэнтам, яго найбліжэйшым асяроддзем і іншымі высокапастаўленымі супрацоўнікамі Белага дома і ўплывовымі вашынгтонскімі палітыкамі.
У прыватнасці, у кнізе сцвярджаецца, што злашчасную сустрэчу сына прэзідэнта і іншых членаў перадвыбарчага штаба Трампа з Наталляй Весяльніцкай у «Трамп-таўэр» Бэнан назваў «здрадніцкай» і «непатрыятычнай».
«У Стыва Бэнана няма нічога агульнага са мной або з маім прэзідэнцтвам. Калі яго звольнілі, ён не толькі страціў пасаду, ён яшчэ страціў розум», — заявіў у адказ Трамп.
«Стыў быў супрацоўнікам, які працаваў на мяне ўжо пасля таго, як я атрымаў намінацыю [ад рэспубліканцаў], абышоўшы 17 кандыдатаў, якіх называюць адной з самых таленавітых груп прэтэндэнтаў, якую калі-небудзь збірала Рэспубліканская партыя», — дадаў ён.
«Цяпер, калі Стыў пусціўся ў адзіночнае плаванне, ён зразумеў, што перамагаць не так проста, як можа здацца, гледзячы на мяне. Стыў мала што зрабіў для нашай гістарычнай перамогі, якую забяспечылі забытыя мужчыны і жанчыны гэтай краіны», — заявіў прэзідэнт.
Былы галоўны стратэг Белага дома Стыў Бэнан лічыўся адным з асноўных гульцоў у камандзе Трампа. Менавіта ён дапамог Трампу сфармаваць кампанію пад лозунгам «Амерыка — перш за ўсё», перш чым пакінуў сваю пасаду ў жніўні 2017 года.
Цяпер чытаюць
Беласток на вушах праз знікненне актывіста Вайцяхоўскага, суседа памерлага шпіёна Усера. А той цішком вярнуўся ў Беларусь14
Каментары