Бык выбраўся з загарадзі і напаў на 69-гадовага мужчыну. Сусед убачыў гэта і, ратуючы пацярпелага, кінуўся на жывёлу з металічнай трубой, паведамляе «Інфа-Кур'ер».
Зараз пацярпелы пажылы мужчына знаходзіцца ў рэанімацыі Слуцкай бальніцы. Ён у цяжкім стане.
Інцыдэнт адбыўся каля 11 гадзін дня ў нядзелю, 24 чэрвеня, у вёсцы Ячава Слуцкага раёна.
69-гадовы мужчына жыве ў вёсцы з жонкай. Практычна кожны дзень да іх з горада прыязджае сын. У загарадзі каля дома бацькі ён трымае чатырох быкоў. У тую раніцу адзін з іх выбіў сцяну з брускоў і выйшаў на гарод. Убачыўшы гэта, пенсіянер патэлефанаваў сыну. Той папрасіў яго не падыходзіць да быка і дачакацца яго. Сын прыехаў прыкладна праз 10 хвілін.
За гэты час бык азвярэў і пачаў кідацца на дзеда. Падняў яго і падмяў пад сябе. Калі дзед згрупаваўся пад ім, бык стаў на ім «танчыць». Мужчына закрычаў: «Дапамажыце!»
На крыкі аб дапамозе прыбег мужчына з суседняга дома. Ён стаў адганяць быка металічнай трубой. Ёю ён некалькі разоў ударыў жывёлу па галаве і залез на рулон сена, каб пазбегнуць ўдару жывёлы. Бык спрабаваў падкідваць сена, як мяч.
Сусед змог уцячы ад быка, выбег на вуліцу і стаў клікаць астатніх суседзяў на дапамогу. У гэты час пад'ехаў гаспадар быка і віламі загнаў жывёлу ў загон.
Мужчыны разумелі, што на рахунку кожная секунда, таму не сталі выклікаць і чакаць «хуткую» — яны на сваім транспарце адвезлі дзядулю ў прыёмнае аддзяленне.
У яго зламаныя чатыры рэбры, а асколак аднаго з іх прабіў лёгкае. Урачы сказалі, што яшчэ пяць хвілін і мужчыну б не паспелі выратаваць. Шанцаў, што ён выжыве, — 50 на 50.
У рэанімацыі Слуцкай бальніцы «Кур'еру» пацвердзілі, што ў пажылога мужчыны пашкоджаны рэбры і лёгкія. Ён у прытомнасці. Стан яго цяжкі, але стабільны.
Цяпер чытаюць
Зніклы Котаў выехаў з Турцыі морам — магчыма, у бок Расіі4
Каментары