Паводле Сусьветнага банка, у сувязі з глябальным крызысам бяднейшыя краіны сьвету чакае зьніжэньне грашовых пераводаў з‑за мяжы.
Паводле Сусьветнага банка, у сувязі з глябальным крызысам бяднейшыя краіны сьвету чакае зьніжэньне грашовых пераводаў з‑за мяжы.
Паводле прагнозаў Сусьветнага банку, перавод грошай у краіны, што разьвіваюцца, сёлета яшчэ вырасьце на 6,7 працэнта і складзе 283 мільярда даляраў. Але запавольваньне эканамічнага росту на Захадзе, а таксама ў Расеі, Казахстане, Украіне паменшыць перасылку грошай працоўнымі мігрантамі. Экспэрты Сусьветнага банку чакаюць істотнага спаду па выніках 2009—10 гадоў.
У дзесятцы краін, у якія найбольш пераводзяцца заробленыя суайчыньнікамі за мяжой грошы, уваходзяць Індыя, Кітай, Мэксыка, Філіпіны, Польшча, Румынія. У Кітай цягам гэтага году, як чакаецца будзе пераведзена 30 мільярдаў даляраў, у Польшчу —11 мільярдаў.
Дасланыя з‑за мяжы грошы часам зьяўляюцца важнейшай крыніцай матэрыяльнага забесьпячэньня бедных краін. Напрыклад, перасылка грошай з‑за мяжы складае 45 працэнтаў ад валавога ўнутранага прадукту (ВУП) Таджыкістана, 38 працэнтаў — Малдовы.
Беларусь на гэтым фоне выглядае больш сьціпла. У 2006 годзе ў краіну было пераслана 334 мільёны даляраў, што складае 0,9 працэнта ВУП. Такая ж сума пераводаў грошай была зафіксаваная і летась.
Экспэрты Сусьветнага банку ацэньваюць лік эмігрантаў зь Беларусі ў 1 мільён 800 тысяч чалавек, што складае 18,4 працэнта ад агульнай колькасьць насельніцтва. У дзесятцы краін, у якія беларусы найчасьцей едуць на заробкі, уваходзяць Расея, Украіна, Польшча, Літва, Казахстан, ЗША, Ізраіль, Нямеччына, Латвія, Эстонія.
Каментары