«Прапаноўвалі адключыць яго ад апарата»: жонка экс-міністра фінансаў Корбута распавяла пра сённяшні стан мужа
Мікалай Корбут з 1997 па 2008 г. узначальваў Міністэрства фінансаў. У жніўні 2008 г. ён перанёс інсульт. «Народная воля» распытала яго жонку Людмілу Васільеўну, чым зараз жыве былы чыноўнік. 1 лістапада яму споўніцца 70 гадоў.
Лета Корбуты правялі на дачы пад Дзяржынскам, жывуць зусім звычайна.
«У яго ж быў яшчэ і другі інсульт праз некаторы час пасля першага. Вельмі цяжкі. Таму дзякуй Богу, што ўсё так, як ёсць.
Часам капаюся ў гародзе, і проста хочацца яго пазваць, як раней было. Ён вельмі любіў мне дапамагаць. І градкі ў яго былі пад шнурочак. А цяпер усё раблю сама. Нічога, даю рады».
Мова ў Мікалая Корбута парушана, але «ўсё разумее, мы камунікуем… Галоўная крыніца інфармацыі — тэлевізар (на дачы «талерка» — 200 тэлеканалаў ідзе). У яго паралізавана правая рука. Есць ён левай. Да таго ў яго дыябет, я яго чатыры разы калю ў дзень, праблемы са зрокам», — кажа жонка.
«Мы з ім так доўга разам — ужо 45 гадоў. Па-іншаму проста немагчыма!» — адзначае Людміла Васільеўна.
«Мне ж казалі, што ён будзе ледзь не раслінай, — распавядае Людміла Васільеўна, — Такі цяжкі паўторны інсульт здарыўся. Прапаноўвалі адключыць яго ад апарата — нават успамінаць не хочацца… Прыязджала кансультаваць прафесарка з Масквы, сказала: «У Маскве яго не выратавалі б». А нашы беларускія дактары малайцы, дзякуй ім вялікі!»
Па яе словах, муж перасоўваецца ў вазку. Раней ён перасоўваўся пры дапамозе спецыяльнай хадзілкі, але два гады таму жанчына ўпала і зламала рэбры, таму не змагла глядзець мужа, доўга аднаўлялася і перасадзіла яго ў вазок. На жаль, з яго ён больш не падымаецца.
Дзеля мужа сп. Людміла вымушана была кінуць працу — яна была загадчыцай лагапедычнага дзіцячага садка ў Мінску. «Падкасіў мяне Пятровіч», — з сумам рэзюмуе яна.
Цяпер чытаюць
Полк Каліноўскага паведаміў пра гібель трох байцоў2
Каментары