Расія гатовая абмяркоўваць актуалізацыю дагавора аб стварэнні Саюзнай дзяржавы з Беларуссю, заявіў першы віцэ-прэм'ер — міністр фінансаў Расіі Антон Сілуанаў, паведамляе Interfax.by.
«Цяпер створана працоўная група, мы павінны паглядзець на тэкст Саюзнага дагавора дзесьці, магчыма, прапанаваць яго актуалізаваць», — сказаў Сілуанаў у інтэрв'ю РБК ТБ, адказваючы на пытанне аб тым, як развіваецца сітуацыя вакол спрэчкі Мінска і Масквы аб кампенсацыі за падатковы манеўр.
«Мы ўжо казалі пра тое, што ў нас, з аднаго боку, ёсць дагавор аб стварэнні Саюзнай дзяржавы. З іншага боку, у апошнія гады рух па шляху стварэння Саюзнай дзяржавы затармазіўся і практычна не рэалізоўваўся», — сказаў Сілуанаў у інтэрв'ю РБК.
Паводле яго слоў, меркаванне аб тым, што Расія ў гэтай спрэчцы хоча «паўплываць на рашэнне інтэграцыйных пытанняў, нейкіх палітычных праблем» — абсалютна не дакладна.
«Даваць субсідыі прадпрыемствам чужой краіны дзіўна было б. Гэта можна было б рабіць, калі б была ў нас больш глыбокая ступень інтэграцыі. Калі хочаце такі ж рэжым, давайце вернемся да нашага Саюзнага дагавора», — сказаў першы віцэ-прэм'ер.
Ён дадаў, што Расія па-ранейшаму захоўвае падтрымку беларускай эканомікі ў выглядзе крэдытаў, бяспошлінных паставак нафты і льготнай цаны на газ.
На яго думку, беларускім партнёрам «трэба трошкі астудзіцца, паглядзець шырэй на сітуацыю, якая склалася, сесці і выпрацаваць сумесныя рашэнні».
Каментары