КНДР правяла чарговыя ракетныя пускі ў кірунку Японіі. Абвастрэнне ваеннага супрацьстаяння ў рэгіёне адбываецца на фоне перамоваў ЗША, Японіі і Паўднёвай Карэі па паўночнакарэйскай праблематыцы
Паўночная Карэя ажыццявіла запуск «неапазнанага снарада», піша агенцтва «Рёнхап» са спасылкай на паўднёвакарэйскіх вайскоўцаў. Як мяркуецца, гэта ракеты сярэдняй або малой далёкасці.
Запуск быў здзейснены з Пхёнан-Пукто, дзе на адлегласці прыкладна 77 км ад Пхеньяна размешчана адна з ракетных баз КНДР. На гэтай базе размешчаныя балістычныя ракеты сярэдняй далёкасці «Надон». Далёкасць гэтых ракет дасягае 1,3 тыс. км.
Міністэрства абароны Японіі паведаміла, што ракеты ўпалі ў моры за межамі выключнай эканамічнай зоны краіны, піша Japan Times. Пагрозы тэрыторыі Японіі яны не ўяўлялі.
За апошні тыдзень гэта другое ракетнае выпрабаванне, якое праводзіцца Паўночнай Карэяй. У суботу, 4 мая, ваенныя КНДР правялі запуск некалькіх ракет малой далёкасці з горада Вонсана на ўсходнім узбярэжжы ў кірунку Японскага мора. Паводле ацэнак Сеула, яны праляцелі ад 70 да 200 км, перш чым упасці ў моры. Запускі сталі нагодай для склікання тэрміновага пасяджэння сілавых структур Паўднёвай Карэі. У Пхеньяне заявілі, што мэтай запускаў была праверка «буйнакаліберных рэактыўных пускавых установак вялікі далёкасці і тактычнага кіраванага ўзбраення». За вучэннямі асабіста назіраў паўночнакарэйскі лідэр Кім Чэн Ын.
Ракетныя запускі прайшлі на фоне візіту спецпрадстаўніка ЗША па праблемах КНДР Стывена Бігуна ў Японію і Паўднёвую Карэю. 9 мая пасланнік Белага дома знаходзіцца ў Сеуле, удакладняе Reuters.
Каментары