Хацеў вылецець у Ерэван, але не прайшоў рэгістрацыі: у мінскім аэрапорце затрымалі буйнога махляра з Гомеля
У Нацыянальным аэрапорце Мінска 18 снежня затрымалі 27-гадовага жыхара Гомеля. Мужчына планаваў паляцець у Ерэван, але не прайшоў рэгістрацыю, бо знаходзіўся ў вышуку па падазрэнні ў асабліва буйным махлярстве, піша прэс-служба МКУС.
З патэнцыяльнымі крэдыторамі ён пазнаёміўся восенню 2018 года і вясной 2019 года на інтэрнэт-форумах: прадстаўляўся паспяховым бізнэсмэнам і прапаноўваў супрацоўніцтва. Пазычальнік абяцаў вярнуць валюту і працэнты з прыбытку, якую нібыта планаваў атрымаць у бізнэсе. У адным выпадку — ад паставак шкляной прадукцыі ў Расію, у іншым - ад угодаў на крыптарынку.
Пацярпелыя — 30-гадовы мінчук і 29-гадовы мазырчук — пазычылі яму $ 48,5 тысяч. З іх слоў, укласціся «ў справу» іх заахвоціла жаданне лёгка зарабіць, а фатаграфіі падазраванага з сацсеткі (дарагія курорты, аксэсуары, адзенне, рэчы і г.д.) пераконвалі ў яго прыстойным статусе. У выніку мужчыны сталі ахвярамі няхітрай афёры, а іх грошы фігурант выдаткаваў на турпаездкі.
Калі надыходзіў абумоўлены тэрмін вяртання грошай, малады чалавек прасіў адтэрміноўку і дадатковую пазыку пад большы працэнт. Каб пераканаць крэдытораў у паспяховым развіцці бізнэсу, аднойчы ён вярнуў ім па $ 5 тыс. Праўда, валюта была ўзятая з пазыкі аднаго з пацярпелых.
У рэшце рэшт, ашуканыя мужчыны звярнуліся ў міліцыю. Сышчыкі правялі праверку і перадалі матэрыялы следчым. Па дадзеных фактах махлярства былі распачатыя крымінальныя справы. Даведаўшыся пра гэта, падазраваны вырашыў схавацца за мяжой, але быў затрыманы і змешчаны ў ІЧУ.
P.S. Супрацоўнікі крымінальнага вышуку, правяраючы яго дачыненне да падобных злачынстваў, выйшлі на жыхарку Гомеля. Паводле яе слоў, яна таксама паддалася перакананням земляка, аформіла крэдыт на $ 2 тыс. і перадала яму грошы. Зараз гэты факт правяраецца.
Цяпер чытаюць
Памёр 50-гадовы спецназавец Буцько. Ён быў удзельнікам выкрадання і забойства Захаранкі і Ганчара31
Каментары