На Талстога закрыюць рух пад мостам: будуць будаваць эстакаду. Дарожнікі папярэджваюць пра заторы
Уначы 14 сакавіка на вуліцы Талстога закрыюць дарогу для руху транспарту пад пуцеправодам праспекта Незалежнасці: камунальнікі пачнуць будаўніцтва эстакады. Пра гэта Auto.tut.by паведаміў заказчык работ ГП «Гардарбуд».
Запланаваная праектам эстакада ўваходзіць у першае гарадское транспартнае кальцо, над завяршальнай, трэцяй чаргой якога цяпер працуюць камунальнікі.
Будаўніцтва эстакады змяняе ў гэтым месцы схему руху транспарту. З 14 сакавіка, каб з вуліцы Талстога патрапіць на Маскоўскую і праспект Незалежнасці, кіроўцам трэба будзе, не даязджаючы да пуцеправода, паварочваць у праезд налева (цяпер ён з аднабаковым рухам). Пасля праезду рух будуць рэгуляваць святлафоры. Адтуль аўтамабілі змогуць праязджаць у абодва бакі Маскоўскай і на галоўны праспект сталіцы.
Пры руху з Маскоўскай на Талстога (калі ехаць з боку станцыі метро «Інстытут культуры») нічога не мяняецца. Але калі вам трэба праехаць з Маскоўскай да плошчы Мяснікова, то прыйдзецца пакруціцца: напрыклад, выскачыць на Талстога, праехаць да Дружнай і назад.
— Каб прапускаць больш транспарту, дарогу праезду каля Талстога мы пашырылі. Але кіроўцам трэба разумець, што ў гадзіну пік рух тут можа быць ускладнены, таму варта загадзя планаваць свае паездкі, — папярэджвае Аляксандр Ярошык, дырэктар ГП «Гардарбуд». — Грамадскі транспарт будзе там ездзіць з улікам змененай схемы руху.
Для будаўніцтва эстакады камунальнікам трэба выканаць вялікі аб'ём работ: панізіць праезную частку, пракласці новы ўчастак дарогі, памяняць каналізацыю, перанесці інжынерныя сеткі. У выніку атрымаецца развязка ў выглядзе пятлі, якая дасць магчымасць транспарту паварочваць з Талстога налева і направа. Адрэзак вуліцы Талстога пашыраць да трох палос у кожным кірунку.
Праца пад пуцеправодам на Незалежнасці павінна завяршыцца ў жніўні гэтага года — транспарт паедзе па ранейшай схеме. А вось новай эстакадай можна будзе скарыстацца, толькі калі першае гарадское кальцо злучаць — у 2021 годзе.
Цяпер чытаюць
За мінулы год насельніцтва Беларусі скарацілася яшчэ на 53 тысячы чалавек5
За мінулы год насельніцтва Беларусі скарацілася яшчэ на 53 тысячы чалавек
«Трэба сесці і размаўляць. Калі не атрымліваецца — устаць і пайсці». Коўл заявіў пра неабходнасць дыялогу паміж Беларуссю і Літвой на ўзроўні міністраў замежных спраў1919
Каментары