Карыстальнікі сацыяльных сетак заўважылі дастаткова працяглую адсутнасць у навінах міністра замежных спраў Уладзіміра Макея.
Апошні раз на людзях Макей з’яўляўся 5 сакавіка. У гэты дзень ён узяў удзел у ганаровым мерапрыемстве да 50-годдзя ўступлення ў сілу Дамовы аб нераспаўсюдзе ядзернай зброі, а таксама сустрэўся з генеральным сакратаром АДКБ Станіславам Засем.
Пасля гэтага ў публічных мерапрыемствах Макей не ўдзельнічаў.
Не было яго і 17 сакавіка на вялікай нарадзе ў Аляксандра Лукашэнкі, дзе сабраўся «амаль увесь склад ураду».
Праходзіла інфармацыя, што Макей правёў тэлефонныя размовы з дзяржаўным сакратаром ЗША Майкам Пампеа, а таксама з еўракамісарам па суседстве і перамовах аб пашырэнні ЕС Оліверам Верхеі. Але, як кажуць, гэта ўсё адбывалася па-за кадрам.
«НН» пацікавілася ў прэс-сакратарам МЗС Анатоля Глаза, куды ж дзеўся міністр.
«Рады паведаміць, што міністр замежных спраў Уладзімір Макей знаходзіцца на працоўным месцы ў добрым здароўі, што пацвярджаецца рэгулярнымі медыцынскімі абследаваннямі.
МЗС функцыянуе ў штатным рэжыме, за выключэннем сістэмы консульскай службы, якая перайшла практычна на кругласутачную працу ў сувязі з неабходнасцю аказання дапамогі па вяртанні на Радзіму шматлікім беларускім грамадзянам», — адзначыў Анатоль Глаз.
Адзначым таксама, што малодшы сын міністра Арцём у сваім інстаграме паведаміў, што не ходзіць у школу, бо туды прыляцела некалькі дзяцей з Італіі. Хлопец выступіў за ўвядзенне каранціна.
Раней паведамлялася, што міністр унутраных спраў Юрый Караеў правёў два тыдні на каранціне.
Каментары