Медыкі распавялі, як будзе працаваць правіла пра «хатні каранцін» для тых, хто вярнуўся з-за мяжы
Галоўны санітарны доктар краіны Наталля Жукава расказала, як будзе працаваць патрабаванне ўрада аб абавязковым 14-дзённым каранціне для тых, хто прыехаў з краін, дзе зафіксаваны выпадкі каранавіруса, паведамляе Tut.by.
— Пастанова Саўміна па рэжыме самаізаляцыі накіравана на тое, каб нашы грамадзяне выкарыстоўвалі прадстаўленую магчымасць і мінімізавалі свае кантакты. Зараз мы разлічваем, што ўзроўню самасвядомасці, ўзроўню ведаў пра сітуацыю ў свеце, дастаткова для таго, каб кожны грамадзянін адказна падышоў да свайго здароўя і здароўя сваіх блізкіх, — сказала Наталля Жукава.
Па словах галоўнага санітарнага доктара, меры адміністрацыйнага ўздзеяння альбо прыцягненне сілавых структур, каб прымусіць выконваць правілы хатняга каранціну, пакуль не разглядаюцца.
— Выключэнне — тыя, хто прыбыў з эпідэміялагічна неспрыяльных краін. Тут мы працуем з органамі ўнутраных спраў, кантралюем самаізаляцыю, — распавяла Наталля Жукава.
Паводле яе слоў, тыя, хто перасякае мяжу сёння, не падлягаюць абавязковаму кантролю на наяўнасць каранавіруса. Самае галоўнае, незалежна ад выніку, каб чалавек у абавязковым парадку 14 дзён знаходзіўся ў рэжыме самаізаляцыі. Калі з'яўляюцца сімптомы, пацыент абавязаны выклікаць доктара. У гэтым выпадку ў яго возьмуць мазок на каранавірус.
Нагадаем, з 27 сакавіка, па пастанове Савета міністраў, усе людзі, якія прыбылі ў Беларусь з краін, у якіх рэгіструюцца выпадкі інфекцыі COVID-19, на працягу 14 каляндарных дзён з дня прыезду:
павінны знаходзіцца ў самаізаляцыі ў хатніх умовах;
не падлягаюць наступнаму пропуску праз мяжу Беларусі (да заканчэння тэрміну самаізаляцыі).
Выключэнне зроблена для некалькіх катэгорый грамадзян, у тым ліку для дыпламатаў, дальнабойшчыкаў і тых, хто вяртаецца дадому ў іншую краіну транзітам праз Беларусь.
Каментары