У каталікоў і пратэстантаў — Вялікдзень. Першы на нашай памяці, калі біскупы заклікалі свяціць стравы дома
Рыма-каталікі, грэка-каталікі і пратэстанты адзначаюць 12 красавіка Вялікдзень — свята ў памяць пра ўваскрасенне Хрыста.
Сёлета свята адбываецца ва ўмовах пандэміі. Напярэдадні арцыбіскуп Тадэвуш Кандрусевіч заклікаў вернікаў святкаваць Вялікдзень дома і адмяніў традыцыйнае бласлаўленне велікодных страваў біскупамі, каб пазбегнуць збору вялікай колькасці людзей.
Парадак бласлаўлення велікодных страваў у парафіях вызначаюць пробашчы, кіруючыся разважлівым падыходам і інтарэсамі вернікаў.
Таксама Кандрусевіч спецыяльным Дэкрэтам дазволіў вернікам сёлета здзейсніць бласлаўленне велікодных страваў у хатніх умовах.
Святую імшу з мінскай Катэдры можна глядзець анлайн:
Таксама 12 красавіка у 16:20 на тэлеканале «Беларусь 3» — жывая трансляцыя з Ватыкана Велікоднага паслання і благаславення «Гораду і свету» Папы Рымскага Францішка.
Праваслаўны свет адзначыць Вялікдзень 19 красавіка, а сёння ў праваслаўных — Вербніца.
Не забудзьцеся павіншаваць знаёмых і сяброў са святам.
Хрыстос уваскрос! Сапраўды ўваскрос!
Каментары