Стала вядома, за колькі Гуцэрыеву прадалі дзяржаўны «Парытэтбанк». Аналітык кажа, што гэта дорага
Дзяржаўны камітэт па маёмасці месяц таму паведамляў, што 99,83% акцый дзяржаўнага «Парытэтбанка» прададзеныя кампаніі Beristore Holdings Limited, дзе асноўны бенефіцыяр — гэта сын Міхаіла Гуцэрыева, Саід.
Стала вядома, за якую суму прадалі банк — гэта $50 мільёнаў.
Пра гэта паведамляе тэлеграм-канал HARBACEVIČ.
«Нашай Ніве» гэтую інфармацыю пацвердзілі бізнес-партнёры Саіда Гуцэрыева.
Але $50 мільёнаў — гэта мала ці зашмат?
На гэтае пытанне адказвае фінансавы аналітык каманіі Duff & Phelps Максiм Адаскевiч.
«Сума ўгоды $50 мільёнаў азначае, што Гуцэрыеў купіў банк за суму, блізкую да памеру 100% яго капіталу — $53 мільёны.
Каб ацаніць, наколькі гэта рынкавая ацэнка, паглядзім на кейс «Белінвестбанка»: дзяржава просіць у ЕБРР за «Белінвестбанк» тыя ж 100% капіталу (гэта $260 мільёнаў), пры гэтым ЕБРР прапаноўваў толькі палову ад гэтай сумы.
А «Белінвестбанк» нашмат больш прыбытковы за «Парытэтбанк» (рэнтабельнасць капіталу 7,3% супраць 0,5% ).
Калі глядзець на тое, за колькі купляюцца банкі Усходняй Еўропы, то каля 80% капіталу — гэта столь. І тое, столькі плацяць толькі за значна больш прыбытковыя банкі, чым беларускія дзяржбанкі.
У мінулым годзе той жа ЕБРР заплаціў 80% капіталу за адзін з сербскіх банкаў з рэнтабельнасцю капіталу ў 12%, і за тыя ж 80% капіталу адзін з македонскіх банкаў з рэнтабельнасцю капіталу ў 14% быў набыты французскім Societe Generale. I гэта да крызicy.
Такім чынам, ацэнка «Парытэтбанка» выглядае завышанай з пункту гледжання рынкавага кошту, якi, на маю думку, складае не больш за палову капіталу (гэта значыць $20 — $25 мільёнаў), калі арыентавацца на паказчыкі банка і параўнальныя ўгоды па куплі іншых банкаў», — лічыць Адаскевіч.
Цяпер чытаюць
Сілавікі расказалі, за што правялі хапун на тэнісным матчы7
Сілавікі расказалі, за што правялі хапун на тэнісным матчы
«Аднавілі грамадскі парадак, не саступіўшы патрабаванням новых выбараў». Што піша Грокіпедыя пра пратэсты, Лукашэнку, мову і як дзеліць спадчыну ВКЛ1212
Каментары