Лукашэнка пра каранавірус: Каб мы з гэтымі пратэстунамі па вуліцах не цягаліся, то сітуацыя б была іншай
Падчас наведвання Слуцкага раёна Аляксандр Лукашэнка выказаўся пра сітуацыю з каранавірусам, піша БелТА
«Пакуль у нас сітуацыя кантраляваная абсалютна, — заявіў ён. — Лекаў дастаткова, мы стварылі сістэму. Мы не цягнем за ўсіх у бальніцы. Калі ўжо чалавек цяжкі, калі мы бачым у яго прагрэс па хваробе сур'ёзны, вядома, мы яго ў бальніцу. Бо раптам трэба на кісларод, на ШВЛ яго трымаць».
«Трэба нармальна жыць (займацца спортам, правільна харчавацца), пастаянна рыхтаваць сябе да любой хваробы. І калі бог будзе бачыць, што ты сам сябе стараешся падтрымліваць, абараняць, можа, і дапаможа», — сказаў Лукашэнка.
«У Беларусі пакуль гэтая сітуацыя кантраляваная. Але расслабляцца ні ў якім выпадку нельга. Я яшчэ думаю: калі б мы з гэтымі пратэстунамі па Мінску па вуліцах не цягаліся, была б зусім іншая сітуацыя. У нас Мінск дае палову захварэлых. А ў першую хвалю даваў 25-30%. Бо больш за ўсё мы цягаемся па вуліцах менавіта ў Мінску. Але справімся», — рэзюмаваў ён.
Аляксандр Лукашэнка згадаў і пра ўласны досвед, калі ён фактычна на нагах перанёс гэтую хваробу у перыяд перадвыбарчай кампаніі: «Што для мяне каштоўна — я зразумеў, што гэта за хвароба. Самае галоўнае, калі захварэеш, каб не было псіхозу. Я гэта інтуітыўна адчуў, яшчэ калі сам не хварэў».
Кіраўнік дзяржавы канстатаваў, што спачатку ў яго метады ва ўмовах пандэміі ў Беларусі большасць насельніцтва не паверыла.
«Я шчыра гэта прызнаю. Страшна было, але я разумеў, што ўся хвароба — у галаве. Фізічна мы перанясём раны, траўмы і іншае. Але калі ты пачынаеш паддавацца псіхозу — усё, — заўважыў ён. — Кавід стаў самай страшнай хваробай. Людзі ўжо забыліся пра анкалогію і думалі пра гэты вірус. Гэта няправільна, я гэта адчуваў. Гэта мая інтуіцыя, вопыт. І спрабаваў вам гэта ў галаву ўкласці і дагрукаліся да вас. Вы мне не паверылі. Але цяпер то вы пераканаліся, што я меў рацыю».
Аляксандр Лукашэнка нагадаў, што не проста так аднойчы сказаў пра тое, што каранавірус пройдзе, а «жэрці што будзем?».
«Я проста хацеў, каб вы запомнілі. Я меў рацыю. Мая галоўная парада, яна і цяпер актуальна: ніякага псіхозу!»- сказаў ён.
Лукашэнка адзначыў, што, хутчэй за ўсё, з гэтай хваробай давядзецца жыць, як і ў выпадку з грыпам. «Будзе вакцына — правакцынуем людзей», — падсумаваў ён.
Каментары