Беларусы з 16 студзеня 2021 года змогуць без віз наведваць ААЭ, паведамляе МЗС.
Міністэрства замежных спраў Аб'яднаных Арабскіх Эміратаў паведаміла беларускаму боку аб завяршэнні ўнутраных працэдур, неабходных для ўступлення ў сілу пратакола аб унясенні змяненняў у міжурадавае пагадненне паміж Рэспублікай Беларусь і Аб'яднанымі Арабскімі Эміратамі аб узаемнай адмене віз для ўладальнікаў дыпламатычных, службовых і спецыяльных пашпартоў.
«Гэты пратакол на ўзаемнай аснове распаўсюджвае дзеянне бязвізавага рэжыму на грамадзян абедзвюх дзяржаў — уладальнікаў нацыянальных пашпартоў. Беларускі бок ратыфікаваў пратакол раней, у снежні 2019 года», — адзначылі ў МЗС.
Пратакол уступае ў сілу 16 студзеня 2021 года. З гэтай даты грамадзяне Беларусі — уладальнікі звычайных нацыянальных пашпартоў — змогуць уязджаць, выязджаць і перамяшчацца транзітам праз тэрыторыю ААЭ, а таксама знаходзіцца на тэрыторыі ААЭ без віз на працягу 90 дзён з даты ўезду.
Аналагічныя ўмовы ўводзяцца і для грамадзян ААЭ на тэрыторыі Беларусі.
Каментары