Колькі даюць за тое, што сп'яну застрэліш сябра на нелегальным паляванні? 2,5 года хатняй хіміі
Беларускія суды працягваюць жорстка караць пратэстоўцаў. Надпіс на асфальце? Два гады калоніі. Стукнуў па машыне ДАІ? Тры гады калоніі. Кінуў кветкі ў АМАП? Чатыры гады ўзмоцненага рэжыму. Складваецца ўражанне, што на выракі па палітычных справах не ўплываюць ні прызанне віны, ні наяўнасць дзяцей, ні якія іншыя абставіны. Але ж тым часам у краіне праходзяць і іншыя судовыя працэсы. Напрыклад, суд Міёрскага раёна агучыў прысуд мясцоваму жыхару, які сп’яну застрэліў на паляванні свайго знаёмага.
Усё адбылося яшчэ ў чэрвені. «Абвінавачаны Ж.», як яго называюць у паведамленні суда, быў п’яны «падчас правядзення незаконнага палявання». Пры сабе меў незарэгістраваную стрэльбу.
«У нейкі момант 42-гадовы мужчына заўважыў рух у кустах і, палічыўшы, што гэта жывёла, стрэліў», — паведамлялі следчыя.
Аказалася, што ў кустах быў той самы знаёмы. Паранены памёр на месцы.
На судзе Ж. прызнаў віну. Абцяжарваючымі абставінамі прызналі тое, што ён быў на паляванні п’яны, а «абставінамі, якія змякчаюць адказнасць абвінавачанага, прызнаныя чыстасардэчнае раскаянне і наяўнасць на ўтрыманні дваіх малалетніх дзяцей».
Прысуд — 2 гады і 6 месяцаў хатняй хіміі за прычыненне смерці па неасцярожнасці. Ну і на 5 гадоў мужчыну забаронена паляваць.
А што, не на асфальце ж маляваў.
Каментары