Чым цяплей становіцца на дварэ, тым большая спакуса гуляць, сядзець на тэрасах кавярань, трэніравацца. Аднак наколькі вялікая верагоднасць заразіцца каранавірусам на дварэ? І ці ёсць сэнс насіць маску на вуліцы? Вось меркаванні экспертаў.
Рызыка заразіцца кавідам на свежым паветры значна меншая, чым у памяшканні, піша DW.
Ключавую ролю ў распаўсюджванні каранавіруса адыгрываюць аэразолі, дробныя часціцы паветра, якія могуць перамяшчацца на адлегласць да двух метраў. Аднак эксперты сцвярджаюць, што на адкрытым паветры рызыка заражэння нашмат меншая.
«Гэта звязана з тым, што цыркуляцыя паветра на дварэ большая дзякуючы ветру», — адзначае Ніка Мутэрс (Nico Mutters), кіраўнік Інстытута гігіены і грамадскай аховы здароўя пры Універсітэцкай клініцы Бона (Institute for Hygiene and Public Health at Bonn University Hospital).
Вецер не распаўсюджвае інфекцыю яшчэ больш, а якраз наадварот: чым мацнейшы вецер, тым хутчэй рассейваюцца аэразолі, якія могуць быць носьбітамі віруса.
Дробныя часціцы, якія выдыхаюць людзі, нашмат хутчэй рассейваюцца на свежым паветры. Аднак верагоднасць заражэння нельга выключаць цалкам, калі людзі збіраюцца вялікімі групамі і не прытрымліваюцца сацыяльнай дыстанцыі.
Таму захаванне бяспечнай дыстанцыі ад 1,5 да 2 метраў застаецца пажаданым нават на адкрытым паветры.
Навукоўцы сцвярджаюць, што асаблівую ўвагу трэба надаваць дыстанцыі з тымі, хто займаецца спортам. Пры фізічных нагрузках дыханне становіцца больш частым і глыбокім, а гэта значыць, што вылучаецца больш аэразоляў. Таму кантактныя віды спорту на адкрытым паветры ўяўляюць сабой небяспеку.
У выпадку, калі няма магчымасці падтрымліваць дыстанцыю, варта карыстацца маскай. Асабліва ў тых месцах, дзе немагчыма пазбегнуць натоўпу, напрыклад на аўтобусным прыпынку.
Пакуль няма адназначнага навуковага адказу, ці ёсць розніца для распаўсюджвання кавіду, калі на вуліцы цёпла або халодна. Амерыканскія навукоўцы даследавалі каранавірусную інфекцыю ў розных кліматычных умовах, аднак не знайшлі выяўнай сувязі з колькасцю выпадкаў захворвання.
Цяпер чытаюць
«Я пра мужоў-беларусаў чую толькі: «Ніколі зноў!» Чаму бчб-нявеста Іна Зайцава на год знікла з сацсетак і што з ёй цяпер?2
Каментары