Расія адобрыла тры вакцыны — спачатку «Спутнік-V», пасля «Эпіваккарона» і «КавіВак». Аднак клінічныя выпрабаванні апошніх дзвюх яшчэ не завершаныя.
Усе тры вакцыны былі адобраныя ўрадам да завяршэння клінічных выпрабаванняў, якія складаюцца з трох фаз. Трохфазнасць выпрабавання — міжнародна прызнаны навуковы стандарт, накіраваны на гарантаванне бяспекі і эфектыўнасці вакцын, піша DW.
«Спутнік-V» быў адобраны ў Расіі яшчэ ў жніўні 2020, аднак клінічныя выпрабаванні гэтай вакцыны скончыліся толькі сёлета ў лютым.
Як правіла, вакцына або іншы прэпарат становяцца масава даступнымі толькі пасля таго, як завяршаецца трэцяя фаза клінічных выпрабаванняў, якія мусяць праводзіцца незалежнымі даследчыкамі.
Падчас пандэміі дазваляецца паралельна праводзіць выпрабаванні 2 і 3 стадыі, каб паскорыць працэс.
Расія адобрыла другую вакцыну «Эпіваккарона» летась у кастрычніку, а ў лютым рэгістрацыю прайшла і трэцяя вакцына «КавіВак». Аднак ні першая, ні другая яшчэ не прайшлі клінічныя выпрабаванні да канца.
Вакцына «Эпіваккарона» заснаваная на хімічна сінтэзаваным антыгене — гэта значыць, што ў ёй няма жывога віруса. Антыген — гэта рэчыва, якое прымушае імунную сістэму чалавека выпрацоўваць антыцелы супраць віруса.
Вакцына прайшла першую і другую фазы выпрабаванняў, аднак вынікі трэцяй фазы чакаюцца толькі ў маі. На сённяшні дзень вакцыну адобрылі толькі ў Расіі і Туркменістане.
Вакцыну можна захоўваць у стандартных халадзільніках. Раней расійскі ўрад сцвярджаў, што вакцына паказала эфектыўнасць 100% у папярэдніх выпрабаваннях.
Наконт вакцыны «КавіВак» зусім мала звестак у міжнародных крыніцах. Гэту вакцыну распрацоўвае Цэнтр Чумакова, што з’яўляецца філіялам Расійскай акадэміі навук.
Вакцына ўключае ў сябе спайкавыя бялкі і генетычны матэрыял віруса. Такая форма вакцыны адносна распаўсюджаная ў свеце.
Па словах стваральнікаў, вакцыну можна захоўваць пры тэмпературы ад 2 да 8 °С, што робіць яе зручнай для транспартавання.
Расійскае інфармацыйнае агенцтва ТАСС паведамляла, што КавіВак можна выкарыстоўваць для паўторнай імунізацыі. Таксама вакцына прыдатная для пажылых людзей і людзей з хранічнымі захворваннямі, бо яе пабочныя эфекты, як сцвярджаецца, менш заўважныя, чым у іншых вакцын.
Аднак пытанне наконт трэцяй фазы выпрабаванняў застаецца адкрытым.
Цяпер чытаюць
Просты беларус здзівіў людзей, калі ў Германіі прызнаваўся ў любові да Лукашэнкі. Але аказалася, што ён няпросты23
Каментары