Колькі будзе каштаваць Беларусі авіябайкот у выніку пасадкі Ryanair
І «Белаэранавігацыя», і «Белавія» прыносілі Беларусі вялікія прыбыткі.
Перш за ўсё ад спынення авіязносін з ЕС пацерпіць нацыянальны правайдар аэранавігацыйных паслуг «Белаэранавігацыя».
Мінскі цэнтр кіравання паветраным рухам абслугоўвае 980 кампаній са 100 краін свету. 83% палётаў прыходзіцца на транзітны паток, 17% — з пасадкамі ў Беларусі. Актыўней за ўсё паветраную прастору Беларусі выкарыстоўвалі расійскія авіякампаніі.
Больш за тое, усе грузавыя рэйсы з Блізкага Усходу ў ЗША і з Еўропы ў Кітай праходзілі праз Беларусь. У апошнія дапандэмічныя гады «Белаэранавігацыя» магла зарабляць да $50—70 мільёнаў штогод на дыспетчарскім абслугоўванні замежных авіякампаній. Нават калі частка транзіту захаваецца, страты будуць вылічацца дзясяткамі мільёнаў даляраў штогод.
Што датычыць «Белавіі», кампанія зарабляла найбольш на транзіце пасажыраў між Расіяй і Украінай. Гэты кірунак развіўся пасля таго, як у 2015 годзе спыніліся прамыя авіязносіны між Расіяй і Украінай. Па выніках 2017 года доля трансферных пасажыраў на рэгулярных рэйсах «Белавіі» складала 49%. Таму закрыццё палётаў у ЕС і ва Украіну будзе наймацнейшым ударам для бізнэсу авіякампаніі.
Выручка «Белавія» за дапандэімічны 2019 год склала каля 883 мільёнаў беларускіх рублёў (каля 430 млн USD). Пры гэтым чысты прыбытак «Белавія» і ў 2018, і ў 2019 гадах склаў больш за 68 мільёнаў BYN (каля 33 млн USD). Забарона на палёты «Белавія» ў краіны Еўрасаюза і Украіну, такім чынам, прывядзе да зніжэння абаротаў нават на сотні мільёнаў за год і з усёй імавернасцю зробіць беларускую нацыянальную кампанію стратнай.
Але найбольшыя страты Беларусі будуць ускосныя — ад санкцый і ізаляцыі, у якія краіна трапляе паралельна. Для заходняга бізнэсу Беларусь робіцца ізгоем, для кітайскага і арабскага капіталу яна, адпаведна, таксама ў адзін момант перастае быць прывабнай. Краіна страчвае свае транзітныя перавагі і перастае разглядацца як трамплін у рэгіён.
Цяпер чытаюць
Беларус набыў кватэру ў Іспаніі, але яе занялі акупасы. Цяпер ён не можа яе вярнуць23
Каментары