Велізарныя суткі і штрафы: як судзілі затрыманых за ўскладанне кветак на месцы гібелі Тарайкоўскага
У судзе Фрунзенскага раёна 11 жніўня разглядзелі справы трох мінчукоў. Іх затрымалі 10 жніўня — на гадавіну гібелі Аляксандра.
Спачатку затрымалі 40-гадовую Наталлю Шэкаву.
У жанчыны ёсць непаўналетняе дзіця, але замест трох гадзін, як таго патрабуе закон, яе пратрымалі за кратамі ноч да суда.
На судзе Наталля распавяла, што ў яе не было ніякіх палітычных матываў, а толькі — чалавечыя. Па словах жанчыны, яна гуляла каля месца гібелі Тарайкоўскага, успомніла падзеі мінулага года і вырашыла пакласці кветкі на тым месцы.
Суддзя Юлія Чыж расцаніла гэты ўчынак, як пікетаванне і пакарала жанчыну па арт. 24.23 КаАП штрафам 2900 рублёў
На тым жа месцы каля 17:03 затрымалі 20-гадовага Аляксея Латошу. Аляксей пацвердзіў, што ў памяць аб загінулым уваткнуў кветкі ў слуп. Але адразу пасля гэтага яго затрымалі людзі ў цывільным. Суддзя Чыж цікавілася, чаму ён зрабіў гэта менавіта каля метро, а не на могілках.
Хлопец дадаў, што ў яго ёсць малое дзіцё, таму ён шкадуе аб учыненым і хоча быць зараз з імі, а не за кратамі. Вынік — 13 сутак.
Вечарам затрымалі 23-гадовага Кастуся Цаўлоўскага. Сваю віну хлопец на судзе адмаўляў, бо не ведаў, што ўскладанне кветак расцэньваецца, як «несанкцыянаванае пікетаванне». Ён патлумачыў, што зрабіў гэта, каб ушанаваць памяць аб загінулым, а не для выказвання сваіх палітычных інтарэсаў. Вынік — 30 сутак арышту, паведамляе spring96.org.
Ціханоўскі патлумачыў, чаму ён так паводзіў сябе ў Нью-Ёрку124
Каментары