Vielizarnyja sutki i štrafy: jak sudzili zatrymanych za ŭskładańnie kvietak na miescy hibieli Tarajkoŭskaha
U sudzie Frunzienskaha rajona 11 žniŭnia razhladzieli spravy troch minčukoŭ. Ich zatrymali 10 žniŭnia — na hadavinu hibieli Alaksandra.
Spačatku zatrymali 40-hadovuju Natallu Šekavu.
U žančyny jość niepaŭnaletniaje dzicia, ale zamiest troch hadzin, jak taho patrabuje zakon, jaje pratrymali za kratami noč da suda.
Na sudzie Natalla raspaviała, što ŭ jaje nie było nijakich palityčnych matyvaŭ, a tolki — čałaviečyja. Pa słovach žančyny, jana hulała kala miesca hibieli Tarajkoŭskaha, uspomniła padziei minułaha hoda i vyrašyła pakłaści kvietki na tym miescy.
Sudździa Julija Čyž rascaniła hety ŭčynak, jak pikietavańnie i pakarała žančynu pa art. 24.23 KaAP štrafam 2900 rubloŭ
Na tym ža miescy kala 17:03 zatrymali 20-hadovaha Alaksieja Łatošu. Alaksiej paćvierdziŭ, što ŭ pamiać ab zahinułym uvatknuŭ kvietki ŭ słup. Ale adrazu paśla hetaha jaho zatrymali ludzi ŭ cyvilnym. Sudździa Čyž cikaviłasia, čamu jon zrabiŭ heta mienavita kala mietro, a nie na mohiłkach.
Chłopiec dadaŭ, što ŭ jaho jość małoje dzicio, tamu jon škaduje ab učynienym i choča być zaraz ź imi, a nie za kratami. Vynik — 13 sutak.
Viečaram zatrymali 23-hadovaha Kastusia Caŭłoŭskaha. Svaju vinu chłopiec na sudzie admaŭlaŭ, bo nie viedaŭ, što ŭskładańnie kvietak rasceńvajecca, jak «niesankcyjanavanaje pikietavańnie». Jon patłumačyŭ, što zrabiŭ heta, kab ušanavać pamiać ab zahinułym, a nie dla vykazvańnia svaich palityčnych intaresaŭ. Vynik — 30 sutak aryštu, paviedamlaje spring96.org.
Ciapier čytajuć
Čym ciapier žyvie Ksienija Vołkava z «Apošniaha hieroja»? Čverć stahodździa tamu hetaja biełaruska trapiła na trapičny vostraŭ1
Kamientary