Літоўцы цяпер будуць вазіць грузы чыгункай праз Польшчу ці Латвію або праз Беларусь фурамі
Рэагуючы на сённяшнія дзеянні Беларусі з перакрыццём з 7 лютага перавозкі грузаў з Літвы чыгуначным транспартам, некаторыя вытворцы краіны ўжо шукаюць новыя маршруты праз Польшчу, кажа прэзідэнт Літоўскай асацыяцыі марскіх пагрузачных кампаній Вайдотас Шылейка. Па яго словах, літоўскія перавозчыкі маглі б перавозіць грузы фурамі або па чыгунцы праз Латвію ці Польшчу, піша delfi.lt.
Кампанія «Літоўскія чыгункі» раней паведамляла, што без уліку пустых вагонаў з-пад калійных угнаенняў, якія вяртаюцца ў Беларусь, у сярэднім з Літвы ў Беларусь з 1 лютага едзе каля 18 цягнікоў у дзень. З іх у лютым прыкладна 30% (5—6) саставаў загружаюцца на літоўскіх станцыях, а вялікая іх частка ідзе ў Беларусь, Расію ды Украіну.
Як паведамляе кампанія, сфармаванымі ў Літве саставамі перавозяцца пераважна нафтапрадукты, угнаенні і чорныя металы.
Як цяпер будуць вазіць гэтыя грузы?
«Адзін з маршрутаў — перавесці частку грузаў з чыгункі на аўтатранспарт і перавозіць іх у аб'езд Беларусі ці, калі не будзе перакрыты транзіт аўтатранспартам, то перасякаць Беларусь аўтатранспартам. Іншае рашэнне — аб'язджаць Беларусь і спрабаваць везці грузы па чыгунцы праз Латвію. Аднак узнікаюць сумневы, ці будзе забяспечаная дастатковая прапускная здольнасць транзітных грузаў па гэтым маршруце. Яшчэ адна альтэрнатыва — перавозка грузаў праз Польшчу, якую выпрабавалі некаторыя літоўскія вытворцы»,
— сказаў Вайдотас Шылейка ў каментары для СМІ.
Шылейка кажа, што з-за спынення транзіту праз Беларусь могуць пачацца перабоі з перавозкай грузаў у 2-3 млн тон ці нават больш з Клайпедскага порта. Ланцужкі паставак падаражэюць, таму натуральна, што ўладальнікі грузаў стануць думаць, ці абіраць Клайпедскі порт для іх транспартавання ўвогуле.
Чытайце таксама:
Больш як на 1 млрд даляраў штогод. Беларусь уводзіць забарону на чыгуначны транзіт з Літвы нафтапрадуктаў і іншых грузаў
Ландсбергіс пра пагрозы Лукашэнкі Літве: Трэба прызнаць, спадару Аляксандру вынаходлівасці не займаць
Лукашэнка даручыў прыняць меры супраць Літвы ў выпадку адмовы ад транзіту грузаў з Беларусі
Галоўчанка анансаваў «жорсткія меры» ў дачыненні да Літвы
У панядзелак праз Літву прайшлі апошнія цягнікі з грузам «Беларуськалія»
Цяпер чытаюць
Шэсць фактаў пра Андрэя Шведа — былога генпракурора, які цяпер стаў старшынёй Вярхоўнага суда4
Каментары