У Арменіі пратэстуюць супраць словаў Лукашэнкі другі дзень. Прайшла яшчэ і акцыя пратэсту каля беларускай амбасады
9 лютага акцыю пратэсту перад беларускай амбасадай у Ерэване зладзіла партыя Нацыянальна-дэмакратычны полюс, якая стаіць на антырасійскіх і празаходніх пазіцыях. Таксама супраць словаў Лукашэнкі выказаліся некаторыя дэпутаты парламента, піша Белсат.
«Дыктатар Беларусі прадаў краіну і сваю асобу Расіі, каб крыху падоўжыць уласнае кіраванне, і стаў прэс-сакратаром Пуціна. Нагадаем, прэзідэнт Беларусі Лукашэнка назваў Арменію нікому не патрэбнай (чытай: нікчэмнай) краінай», — гаворыцца ў паведамленні прыхільнікаў арганізацыі.
Раскрытыкавалі Лукашэнку і дэпутаты розных фракцый армянскага парламента.
Так, прадстаўнік кіроўнай фракцыі «Грамадзянская дамова» Вагаршак Акап’ян заявіў, што «падобныя словы непрымальныя і недарэчныя для прэзідэнта краіны, а такія фармулёўкі заганныя».
«Кіраўнік нашай краіны-партнёра не мае права выказваць падобныя думкі ў дачыненні іншай краіны-партнёра. Жадаю нагадаць, каму патрэбная была Арменія падчас апошніх падзеяў у Казахстане. Я ўпэўнены, што спадар Лукашэнка лепш за ўсіх ведае, каму патрэбная Арменія», — сказаў ён.
Ягоны калега Авік Агазар’ян заявіў, што «такія людзі, як Лукашэнка і Маргарыта Сіманьян, сваёй дзейнасцю аказваюць мядзведжую паслугу расейскаму ўраду і расійскай дзяржаве. Перш чым рабіць такія заявы, лепш бы Лукашэнка паглядзеў, што робіцца ў мінскім аэрапорце, які больш падобны да свінарніка».
А іншы дэпутат Рустам Бакаян сказаў:
«А каму патрэбны Лукашэнка? Гэтае рытарычнае пытанне, думаю, беларускі народ яму задаў, і тыя працэсы, якія адбыліся ў краіне, былі дакладнай ацэнкай ягонага мінулага тэрміну кіравання, таго, у якім стане ён утрымліваў краіну, і якім стаў вынік».
У сваю чаргу в. а. спікера парламента Арменіі Акоп Аршак’ян заявіў, што краіна не абмяркоўвае далучэння да «Саюзнай дзяржавы».
Канфлікт узнік з-за таго, што ў нядаўнім інтэрв'ю расійскаму прапагандысту Уладзіміру Салаўёву Лукашэнка сказаў: «Арменіі дзявацца няма куды. Вы кажаце, камусьці патрэбныя? Яны ўжо ўбачылі. Азербайджан выбіваецца з гэтай кагорты, мы там шмат памылак нарабілі. Гэта асобная размова. І там, проста, Турцыя вельмі моцна падтрымлівае Азербайджан. Праз Турцыю ідуць шляхі, газ, нафта…»
Пасля гэтага МЗС Арменіі заявіла, што своеасаблівае меркаванне Лукашэнкі не мае нічога супольнага з Арменіяй і яе замежнай палітыкай і «прызначана выключна для ўнутрыпалітычнага парадку дня». А пасол Беларусі ў Арменіі Аляксандр Канюк выклікаўся ў МЗС на размову.
Чытайце таксама:
Пасла Беларусі ў Арменіі выклікалі ў мясцовы МЗС з-за выказвання Лукашэнкі
Ерэван: Своеасаблівае меркаванне Лукашэнкі не мае нічога супольнага з Арменіяй і яе замежнай палітыкай
Цяпер чытаюць
Крык душы Жыгара пра групу Кавалеўскага: Гучаць заявы, што Лукашэнка легітымны прэзідэнт, хоць і не абраны дэмакратычна43
Каментары