На паўтара месяца закрыюць Румлёўскі мост у Гродне. Хоць спярша хацелі толькі на пару дзён
Румлёўскі мост праз Нёман планавалася закрыць на 16 і 17 лютага, пра што было афіцыйна паведамлена. Але пачаўшы рамонтныя работы, будаўнікі пераканаліся, што правіць яго трэба больш сур'ёзна.
Днямі прэс-служба ДАІ Гродна распаўсюдзіла паведамленне, што ў адпаведнасці з рашэннем Гродзенскага гарвыканкама, на два дні для руху будзе закрыты Румлёўскі мост праз Нёман:
«З 9.00 16 лютага і да 24.00 17 лютага тут будзе забаронены рух транспарту і пешаходаў. Заезд і выезд з гандлёвых аб'ектаў і АЗС, размешчаных на Румлёўскім праспекце, будзе дазволены. Месца для развароту будзе размешчанае непасрэдна перад мостам».
Для аб'езду прапаноўвалася выкарыстоўваць Усходні мост, або «стары» мост у цэнтральнай частцы горада.
Але калі рабочыя сталі разбіраць палатно, то стала зразумела, што двухдзённым рамонтам тут не абыдзешся. Дзмітрый Савашэвіч, генеральны дырэктар Гродзенскай гарадской ЖКГ, паведаміў:
«Былі выяўленыя некаторыя дэфекты, якія неабходна нам дадаткова абследаваць. Для гэтага рух мы пакуль перакрылі. Пасля дадатковага абследавання: ускрыцця дарожнага палатна, больш дэталёвага абследавання, будзе вядома, якія работы неабходна зрабіць для ліквідацыі выяўленых дэфектаў пры дадатковым абследаванні».
А пакуль што тэрмін закрыцця моста працягнулі аж да 1 красавіка.
Каментары