Праваабарончыя арганізацыі патрабуюць спыніць ціск на незалежныя прафсаюзы
Беларускія праваабарончыя арганізацыі выступілі з сумеснай заявай, у якой патрабуюць вызваліць прафсаюзных лідараў.
«Мы патрабуем неадкладна вызваліць усіх затрыманых прафсаюзных лідараў і актывістаў, а таксама ўсіх палітычных зняволеных. Мы патрабуем неадкладна спыніць дыскрымінацыю незалежных прафсаюзаў, рэпрэсіі, кампанію па запалохванні грамадскіх і прафсаюзных актывістаў, іх адміністрацыйным і крымінальным пераследзе, татальным знішчэнні свабоды асацыяцый.
Мы заклікаем міжнародныя арганізацыі, у тым ліку прафсаюзныя, і праваабаронцаў усіх краін публічна выказаць рашучы пратэст супраць грубых парушэнняў правоў чалавека ў Беларусі і даць ацэнку дзеянням беларускіх улад, выкарыстоўваць усе магчымыя спосабы для аказання ўплыву на змену цяперашняй сітуацыі, а таксама працягваць аказваць падтрымку арганізацыям грамадзянскай супольнасці Беларусі», — гаворыцца ў заяве, падпісанай праваабарончым цэнтрам «Вясна», БХК і Lawtrend
Нагадаем, што 19 красавіка ў офісах прафсаюзаў і ў кватэрах актывістаў прайшлі ператрусы. У сераду 20 красавіка стала вядома пра затрыманне Аляксандра Бухвостава, Віталя Чычмарова, Аляксандра Ярашука, Ірыны Бут-Гусаім, Ігара Ледніка (ён затрыманы яшчэ 18 красавіка), сёння стала вядома пра затрыманне актывіста прафсаюза РЭП Вацлава Арэшкі. Ён знаходзіцца ў СІЗА КДБ.
Таксама няма сувязі з Янай Малаш, Ганнай Дусь, Васілём Бераснёвым, Дзмітрыем Бародкам, Міхаілам Громавым, Вадзімам Пайвіным, Юрыем Беляковым.
Адзіны, каго пасля допыту адпусцілі — Ігар Комлік.
Усе гэтыя людзі — лідары і актыў Беларускага кангрэсу дэмакратычных прафсаюзаў, а таксама Свабоднага прафсаюза металістаў, Свабоднага прафсаюза беларускага, Незалежнага прафсаюза работнікаў радыёэлектроннай прамысловасці, якія ўваходзяць у яго склад.
Цяпер чытаюць
«Я хачу справядлівасці — і для жанчын, і для сябе». Шчырая гутарка з Андрэем Стрыжаком пра скандал з дыкпікамі, залежнасці і будучыню37
Каментары