Дыяспара Беластока збірае подпісы, каб арганізаваць урокі беларускай мовы для школьнікаў з Беларусі
Ініцыятары пачалі кампанію 3 кастрычніка. Яе мэта — арганізаваць заняткі па беларускай мове ў польскіх школах, паведамляе Mostmedia.io.
Чаму ініцыятыва ўзнікла
Беларускую мову ў Беластоку з усіх школ цяпер выкладаюць толькі ў чацвёртай. Прычым вывучаць яе могуць толькі прадстаўнікі беларускай нацыянальнай меншасці — тыя дзеці, чые бацькі маюць польскае грамадзянства і лічаць сябе беларусамі.
Падчас апошняй хвалі эміграцыі ў Польшчы апынуліся многія беларусы, якія хацелі б забяспечыць дзяцей заняткамі беларускай мовай. Але яны не маюць польскага грамадзянства, таму не могуць накіраваць дзяцей у беластоцкую школу №4 з магчымасцю вучыць беларускую мову.
— Але мы лічым, што ведаць родную мову, літаратуру, культуру — надзвычай важна, — адзначаюць ініцыятары. Таму і абвясцілі збор заяў у Дэпартамент адукацыі аб арганізацыі заняткаў беларускай мовай для дзяцей прадстаўнікоў беларускай дыяспары.
Як падтрымаць
Калі вы хочаце далучыцца да кампаніі, калі ласка, запоўніце заяву і прынясіце ў MediaPortBelarus у Беластоку па адрасе: Sienkiewicza 44. Можаце падпісаць заяву адразу на месцы — раздрукаваныя формы чакаюць вас у MediaPortBelarus.
Пасля ініцыятары аднясуць заявы ў Дэпартамент адукацыі.
Заявы збіраюць да 24 кастрычніка. MediaPortBelarus працуе з 9 да 18 гадзін у працоўныя дні.
Пасля таго, як дыяспара атрымае адказ ад Дэпартамента, ініцыятары арганізуюць сустрэчу, на якой абмяркуюць наступныя крокі.
Цяпер чытаюць
Топавы перакладчык паехаў у Беларусь мяняць пашпарт — і сеў за данаты. «КДБ паглядзеў на суму і вырашыў, што ніхто ў здаровым розуме не можа выдаткаваць столькі ўласных грошай»1414
Каментары