WSJ: Саудаўская Аравія баіцца, што Іран пачне з ёй вайну, каб адцягнуць увагу ад пратэстаў
Саудаўская Арабія папярэдзіла ЗША пра тое, што Іран рыхтуецца «найбліжэйшым часам» здзейсніць напад на яе і Ірак. Так гэтая дзяржава нібыта імкнецца адцягнуць увагу насельніцтва ад антыўрадавых пратэстаў, якія доўжацца больш за месяц. Пра гэта выданню The Wall Street Journal паведамілі чыноўнікі Саудаўскай Аравіі і ЗША.
Саудаўскія чыноўнікі заявілі амерыканскім калегам са спасылкай на ўласныя разведзвесткі, што Іран гатовы здзейсніць напады як на іх каралеўства, так і на іракскі горад Эрбіл, спрабуючы адцягнуць увагу ад унутраных пратэстаў, якія бушуюць у краіне з верасня.
У адказ на папярэджанні Саудаўская Аравія, ЗША і некалькі іншых суседніх дзяржаў павысілі ўзровень баявой гатоўнасці сваіх узброеных сіл. А ў Радзе нацыянальнай бяспекі Белага дома пацвердзілі, што занепакоеныя інфармацыяй і гатовыя адказаць на напад з боку Ірана.
«Мы занепакоеныя карцінай пагрозы і знаходзімся ў пастаянным кантакце праз вайсковыя і выведвальныя каналы з саўдытамі. Мы без ваганняў будзем дзейнічаць для абароны нашых інтарэсаў і партнёраў у рэгіёне», — адзначыў суразмоўца WSJ.
З канца верасня Іран ужо атакаваў паўночны Ірак дзясяткамі балістычных ракет і беспілотнікаў. Адзін з іх быў збіты амерыканскім вайсковым самалётам, калі той накіроўваўся да горада Эрбіл, дзе базуюцца войскі ЗША. Падставай для нападу Тэгеран назваў распальванне беспарадкаў ўнутры Ірана курдскімі сепаратысцкімі групоўкамі, якія базуюцца ў Эрбіле (гэта сталіца іракскага Курдыстана).
Акрамя таго, іранскія ўлады публічна абвінавачвалі Саудаўскую Аравію, ЗША і Ізраіль у падбухторванні да антыўрадавых пратэстаў у краіне, а таксама патрабавалі ад саўдытаў абмежаваць трансляцыю дэманстрацый праз свае СМІ.
Іран раней ужо абвінавачвалі ў нападах на аб'екты Саудаўскай Аравіі з-за паўстанцаў-хусітаў, якіх Тэгеран падтрымлівае ў Емене (тады як Эр-Рыяд узначальвае кааліцыю арабскіх дзяржаў, якія ўварваліся ў Емен у 2015 годзе па просьбе тагачаснага еменскага прэзідэнта). Апошні маштабны ўдар адбыўся ў 2019 годзе, у выніку якога была пашкоджаная інфраструктура найбуйнейшай у свеце саудаўскай нафтавай кампаніі Saudi Aramco. Іран афіцыйна абвергнуў сваю датычнасць да той атакі.
Пры гэтым Іран актыўна падтрымлівае Расію ў вайне супраць Украіны, пастаўляючы ёй беспілотнікі і, паводле звестак СМІ, нават балістычныя ракеты. Хоць афіцыйна Тэгеран заяўляе, што не падтрымлівае ніводзін бок канфлікту.
Цяпер чытаюць
Просты беларус здзівіў людзей, калі ў Германіі прызнаваўся ў любові да Лукашэнкі. Але аказалася, што ён няпросты22
Каментары